A zer nolako saltsa sortu den, etxeetako antenen egokitzapen lanekin. Izatez, urte amaiera honetarako, etxe guztietako antenek egokituak behar zuten, urte berritik aurrera arazorik gabe telebista kate guztiak ikusten jarraitu nahi bagenuen. Azkenean ordea, antenak egokitzeko lanen epe muga atzeratu egin dute. Berandu zabiltzatenok adi; lanok burutzeko beste hiru hilabete dituzue, martxoaren 31ra arte.
Atzerapena, Espainiako Gobernuko Ministroen Kontseiluak onartu zuen aurreko ostiralean, urte amaiera honetan oraindik etxebizitzen erdiak egokitzapen lanok egiteke dituela "jakin" ostean. Modu honetan, aintzakotzat hartu dute, antenisten sektoreak azken hilabete hauetan eginiko eskaera. Alegia, ez zegoela denbora nahikorik, egokitzapen lanak egiteko.
Esandakoa honenbestez, etxeko antena egokitu gabe baduzue, lanok burutzeko beste hiru hilabete dituzue gaurtik.
Lanak, itzalaldiari aurre egiteko
4G teknologia berria dator Usurbila eta horrek telebista kateen sintonizazioan eragingo du. Etxebizitzetako antena instalakuntza askotan obrak egin beharko dira. Egokitzapenok egin ezean, apiriletik aurrera hainbat telebista kate ikusi ezinik geratu zaitezkete bestela.
Usurbilgo Udalak NOAUA!ra helarazitako jakinarazpenaren arabera, 3 etxebizitza baino gehiagoko eraikinek lanak egin beharko dituzte antena instalakuntzetan. Eraikinotako bizilagunak beraz, teknikariekin hartuemanetan jarri beharko dira, 2015eko apiriletik aurrera telebista ikusten jarraitu nahi badute. Egokitzapenok egin behar dituzuenok adi, diru-laguntzak eskatzeko aukera izango duzue eta, datorren ekainaren 30era arte.
Zehaztasun gehiago (argibideetarako telefono zenbakiekin batera), Udalak kaleraturiko ohar honetan:
Lurreko Telebista Digitalaren Plan Tekniko Nazionala - 805/2014 Errege Dekretua
Usurbilgo herritarrei honakoa jakinarazten zaio:
Errege Dekretu honek, Lurreko Telebista Digitalaren Plan Tekniko Nazional berria onartzen du.
Dekretuak, Dibidendu Digitaleren liberalizaziorako zenbait gai erregulatzen ditu eta LTD telebista-saio bakoitzari esleitutako kanalen berri ematen da. Plan Tekniko honetan zehazten da 60 eta 69. kanalen arteko LTD kanalen emisio guztiak bertan behera geratu behar direla, eta frekuentzia horiek libre utzi, komunikazio mugikorren eta 4G zerbitzuen erabilerarako. Modu horretan, kanal berrietara migratzeko prozesua zenbait fasetan eta eragindako zenbait kolektiborekin egingo da:
- Operadoreek eta telebistek LTD kanalen emisioak abiarazi dituzte Simulcasten, frekuentzia berrietan, bertan behera geratuko direnekin batera.
- * 3 etxebizitza baino gehiago dituzten eraikinetako jabeen komunitateak Estatuko SETSI Idazkaritzan erregistratutako instalatzailearekin (antenista) jarri beharko dira harremanetan, kanal berriak hartzeko lanetarako. Era berean, Instalazio Buletina gorde beharko dute, fakturaren kopiarekin (eta egindako ordainketaren banku-laburpenaren kopiarekin) batera. Modu horretan, ED bidez onartuko den 2015eko Laguntza Programaren diru-laguntza jaso ahal izango dute.
- Uneren batean, urria amaieratik aurrera, etxebizitza indibidualen erabiltzaileek eta dagoeneko antenizatuta dauden eraikinetako bizilagunez kanalak berriro sintonizatu beharko dituzte modu automatikoan, euren telebistetako urrutiko agintearen bitartez.
- Azkenik, apirilaren 1a baino lehen, 60tik 69ra bitarteko bandan dauden LTD kanalak itzali egin beharko dira, eta esleitutako kanal berriak baino ez dira geratuko emisioan.
Harremanetarako telefonoak:
Gipuzkoako Lurralde Elkarteko Telekomunikazioetako Instalatzailea: ADITEGI - 943 423 922
Era berean, informazio gehiago behar izanez gero edo Dibidendu Digitalaren prozesuari buruzko zalantzaren bat argitu nahi izanez gero, gogorarazten da zeintzuk diren herritarren arretarako webgune eta telefono zenbakiak: www.televisiondigital.es eta 954 307 796 - 901 201 004.