"Oztopoen gainetik euskaraz biziko gara" lemapean, manifestazioa deitu du Kontseiluak, UEMAko kide diren Aduna, Antzuola, Arama, Bergara, Gaintza, Oiartzun, Oñati, Usurbil, Zarautz eta Zeraingo udal ordezkariekin batera, otsailaren 28rako Donostian. 17:30etan abiatuko da mobilizazioa, hitzordua aurkeztu duten gune beretik; Gipuzkoa plazatik. Bulebarrean amaituko da. Hizkuntza-politiketan azken aldian Estatuen zein Nafarroako Gobernuaren bidez jasandako injerentziak salatzea eta hainbat administrazioetako arduradunek aurrera egiteko hartu duten determinazioa txalotzea da mobilizazioaren helburua. Euskaraz bizi nahi duten herritar guztiak manifestazioan parte hartzera gonbidatu dituzte.
UEMA: "Euskarari lehentasuna emateagatik zigortu nahi gaituzte"
“Estatu espainiarrak EAEn duen ordezkariarekin helegiteak jaso ditugun hainbat udaleko ordezkariak bildu gara, hemen. UEMAko udalok hartua dugu hizkuntza-politika aurrerakoiak egiteko erabakia. Asko aurreratu dugu udalen euskalduntzean eta bide horretan sakontzen ari gara. Horregatik, asko gara Carlos Urkixoren errekerimendu eta helegiteak jaso ditugun udalak. Eta oinarri-oinarrian euskarari lehentasuna emateagatik zigortu nahi gaituzte. Horrela, euskararen balio ofiziala ari dira zalantzan ipintzen, eta hori, oso larria da”, azaldu du Maren Belastegi, Bergarako alkateorde eta UEMAko lehendakariak.
Helegiteak helegite, udalek aktak euskaraz bidaltzen jarraitzen dutela azaldu eta bat egiteko beharra azpimarratu du. "Instituzio, eragile nahi herritarrek eskutik hartuta ireki behar diogu euskarari. UEMAtik ahalegin berezia egingo dugu erantzun hori afera honi eman beharreko soluziobideekin lotzen. Izan ere, ez da nahikoa udalei babesa adieraztea. Euskaldunon eskubideak bermatu eta euskaraz aritzea juridikoki babesteko moduak bilatu behar ditugu, ezinbestean. Baita horretarako, legea bera egokitu behar bada ere”, esan du.
Babesa udalei
Kontseiluarentzat helegiteek agerian uzten dute "euskaldunak ez garela askeak. Gaur gaurkoz, ez daukagu guk nahi dugun hizkuntza-politika egiteko dugun eskubidea aitortua. Hori ukatu egiten zaigu. Erabaki hauekin, ikusten ari gara euskarari balioa kendu nahi diotela, beti frantsesaren edo gaztelaniaren ondoan agertzera behartuz”.
Helegiteak jaso dituzten udalei, tartean Usurbilgoari, babesa adierazi die. “Arduradun politiko hauek hartu duten erabakia txalogarria da eta euskalgintzak zein euskaraz bizi nahi duten herritarrek erabaki hori babestu eta eskertzen dugu. Hain zuzen ere, horregatik antolatu dugu otsailaren 28ko manifestazioa. Gure hizkuntza-politikak gauzatzen uzten ez diguten guztien jarrera salatzearekin batera, aurrera egiteko erabakia hartu duten horien jarrera txalotuko eta eskertuko dugu. Eta gainerako instituzioak ere hauek abiatutako bideari jarrai diezaioten animatu nahi ditugu, gero eta gehiago izan daitezen”, adierazi du Paul Bilbaok.
Irudia: UEMA.