Euskal Herrian ditugun arropa diseinatzaile hainbaten erakustokia Sutegi bi asteotan. Estilo ezberdinetan lantzen dituzten jantziak ezagutu, probatu eta erosteko aukera duzue kultur etxeko erakustaretoan. “Neurrira egindako euskal jantziak haur nahiz helduentzat, jantzi serigrafiadunak, arropa koloretsua, asimetrikoak, estilo pertsonalagoa dutenak, klasikoa, kotoi ekologikoa baliatzen dutenak... Oso landua dagoen arropa”, erakusketa antolatu duen Zorionez Mendez herritarrak berri eman digunez.
Arte Ederrak ikasia, patroigintzari loturiko prestakuntza jaso du. Betidanik izan du arroparekiko zaletasuna. “Txikitatik erabilitako arropa gustuko izan dut”, adierazi digu Mendezek. Jantzien berrerabilera, erabilitako jantziei bizia ematea, eta erakusgai jartzea, sarri zaila izan arren. Diseinatzaile baten baino gehiagoren arazo nagusia baita, ezin dutela lokal bat eskuratu. Horretara dator erakusketa baita, sortzaileon erakusleiho eta saltoki izatera, “zer dagoen erakusteko, diseinatzaileei euren burua ezagutzera eman edota salmentarako gunea eskaintzeko".
Euskal Herriko bederatzi disenatzaileren lanak bildu ditu Zorionek, Sutegin. “Iparraldea, Irun, Hondarribia, Azpeitia, Donostia edota Usurbil”, ordezkatuak ikus ditzakegu.
Erakusketa solidarioa
Soinean daramatzagun jantzien jatorria ezagutzen ote dugu? Jatorrira joko bagenu, besteak beste, lan baldintza oso kaxkarretan diharduten jostunen errealitatera hurbilduko ginateke. Sutegiko erakusketa hain zuzen, errealitate gordin hau ezagutzera emateko baliatu nahi du antolatzaileak.
“Kontzientziatzea, nori, zer, non eta nola” erosten dugun. Sentsibilizatzen laguntzeko Gobernuz Kanpoko Erakunde pare baten informazioa aurkitu ahalko duzue. SETEM nazioarteko elkartasuna sustatzen duten 10 GKE-z osaturiko federazioarena batetik. Munduko hainbat lekutan langileek pairatu behar izaten dituzten lan baldintza eskasak salatzen dituzte. Eta animalia guztiak defendatzen dituen Askekintzari buruzko argibideak baita. Hauen berri jaso ahalko dugu, erakusketan zehar eta ekainaren 6ko inaugurazioan.
Inaugurazioa larunbatean
Astelehenaz geroztik zabalik dagoen arren, larunbatean inauguratuko da erakusketa, 19:00etan. Besteak beste, Usurbilgo musika talde instrumental baten estreinako emanaldiak girotuko du ekitaldia; Karamel taldeak.
Epea: ekainak 1-15.
Ordutegia: Astelehenetik ostiralera: 17:00-20:00. Larunbata eta igandea: 12:00-14:00 / 17:00-20:00.
Tokia: Sutegiko auditorioa.
Inaugurazioa: ekainak 6, 19:00:
-Setem (GKE), "emakume jostunen lan baldintzak".
-Karamel musika taldea zuzenean.
