Larunbat honetako Usurbil Herri Anitza jaialdiaren baitan, "Txamunto" eta "Lotzen GaTTunk" abestiak kantatzeko ekimen erraldoia antolatu da Mikel Laboa plazan. Milatik gora lagun bildu nahi dira, herri osoa, #Kilometroak15en alde abesteko.
Azken entseguak egunotan egingo dira. Ondoko irudietan dituzue, astelehenean helduek eginiko prestaketa saioa. Gogotsu eta primeran abesten eta dantzan! Gainerakoei, entseguetara eta larunbateko hitzordura agertzeko gonbita luzatzen die Jaione Eskudero Udarregi Ikastolako musika irakasleak. Datorren prestaketa saioa, ostegun honetan, 18:30etan Agerialden. Ahots guztiak izango dira ongi etorriak.
Garrantzitsuena, parte hartzea
Zenbat lagun bildu dituzue?
Jaione Eskudero: Gure asmoa, 800etik gora izatea da. Milatik gora izatea espero dut. Ezustean agian 2.000 lagun bilduko gara.
Edozein herritar, ahots ongi etorria izango da.
Ahots denak dira onak. Gurasoren bat ikusten dut kalean eta esaten diet ia etorriko diren irailaren 12ko ekitaldira. Ahots txarra dutela esaten dute. Baina ahots denak dira onak. Ez goaz oso ondo abestera, parte hartzera baizik. Hori da garrantzitsuena. Gattunk, #Kilometroak15, ikastola, herria denok etxetik irten beharko genuke larunbatean, abestera.
#Kilometroak15 ekimeneko ardatzetako baten, inklusibitatearen adibide praktikoa ekimen hau.
Hala da. Denok balio dugu denerako eta denok elkarrekin ariko gara. Egunotako entseguetan beste kanta bat ere prestatuko dugu. “Lotzen GaTTunk” kantarekin batera, baita “Txamunto” ere.
Bi kantak abesteko denetariko ahotsen bila zabiltzate.
Edozein ahots. Abestiaren zati batean ahotsak taldeka banatu ditugu. Gizonezkoak, emakumezkoak, haurrak, HH-koak, DBH, LH, irakasle batzuk beste zati bat kantatuko dute… 10 bat zati ezberdin daude. Eta gero denok batera abesteko zatiak ere bai. Zoragarria izango da.
Koreografiak lotuko ditu abesti zatiak?
Abestearekin batera, koreografia izango dugu. Kanta taldeka abestuko dugunez, kantatzea egokitzen zaienei mikrofono aurrera gerturatu beharko dute eta gero atzera mugitu, atzean daudenei abesteko lekua uzteko. Denbora guztian mugimendua ikusiko da. Komeni da entseguetara etortzea.
Azken entsegu egunak dira hauek. Lehen saioak ordea ekainean egin ziren. Nola joan ziren?
Ikastolan prestatzen ari gara eta ikastolakoak jada ondo dakite. Jende asko gaude. Baina hortik kanpo, emakume dezente etorri ziren . Gizonezkoak ez. Usurbildar heldua ezagutzen ari naiz pixkanaka. Gizonezkoak nor joaten den eta zer giro dagoen, horren arabera parte hartuko dute edo ez. Baina etorri behar da bai edo bai, pentsatu gabe.
Larunbatekoa nola duzue antolatua?
Mikel Laboa plazan izango da. Teknikariek mikrofonoak goizean goiz jarriko dituzte. Kokatu ditugu tokiak. 10:30etarako soinu froga egiten egon behar dugu. Bakoitza bere lekuan jartzeko denbora beharko dugunez, lehenago etortzea komeni da.
Adi datozen entseguen egutegiari:
Irailak 10, osteguna
18:30 Entsegu saio orokorra: ikasle ohiak eta parte hartuko dugun guztiok Agerialdeko frontoian.
Irailak 11, ostirala
18:30 Entsegu saio orokorra Mikel Laboa plazan.
Irailak 12, larunbata
Mikel Laboa plazan:
10:30 Soinu froga.
12:30 Txamunto eta Gattunk! abestera.
Antolatzaileak: Jaione Eskudero Udarregi Ikastolako musika irakaslea eta #Kilometroak15-eko ikuskizun batzordea.
LOTZEN GATTUNK...
GaTTunk, GaTTunk,
lotzen gattun harira
GaTTunk, GaTTunk,
lotzen GaTTunk lotzen GaTTunk
Hariketan ari
Harik eta behar den artean ari
artean arin
GaTTunk, GaTTunk,
lotzen gattun harira
GaTTunk, GaTTunk,
lotzen GaTTunk lotzen GaTTunk
lokarri listari sokari hari
GaTTunk, GaTTunk,
lotzen gattun harira
GaTTunk, GaTTunk,
lotzen GaTTunk lotzen GaTTunk
Hari artean, hari tira hari hari
Hari artean, ahalari tiraka
Hari artean, hariari tiraka ari
Hari artean, hari ariketa
Hari artean, hari tira hari tira
Ahalari tiraka, hariketa hariketa
Hari GaTTunk
ari GaTTunk TTunk
Hari GaTTunk
baGaTTunk ari
Hari GaTTunk
ari GaTTunk
BaGaTTunk hari
hari GaTTunk GaTTunk
Lotu josi heldu
Bai baGaTTunk
ba ote goaz
goaztean
Zitxatoztilakoan, genitxatoztinan, gatoztin
Bai baGaTTunk
Zitxatoztilakoan, genitxatoztinan,
goaztean
Hariketan ari
Harik eta behar den artean ari
artean arin