#Kilometroak15 ekimenaren aldeko laguntza nonahi batuko da igande honetako jai erraldoian. Baina badira nabarmentzeko moduko bi elkartasun ekimen; Gattunk Tonbola eta Gattunk Denda. Tonbola, Udarregi Ikastolako lehen gunean kokatuko dute. Denda zirkuituko hiru puntu ezberdinetan.
Urtebeteko ibilbide oparoaren ostean, ostegunean itxi zuten #Kilometroak15 ekimenaren aldeko denda. Denda itxita egon arren, oraindik Gattunk markako produktuak eskuratzeko aukera izango duzue igandeko #Kilometroak15 jaialdian. 3 salmenta postu jarriko dituzte; postu bana, Udarregi Ikastolan, Txaragañan eta Atallun.
Txartel guztiak oparidunak, igandeko azken Gattunk Tonbolan
Opariak baina batez ere ilusioa banatzera dator azken aldiz igande honetan, #Kilometroak15 ekimenaren aldeko elkartasun tonbola. Sagardo Eguneko eta Santixabeletako esperientzia arrakastatsuen ostean, igandean, urriaren 4an hirugarren, eta diogun moduan, azken edizioa ospatuko da. Ana Urdangarin, Larraitz Izagirre eta tonbola kideak zuen zain izango dituzue, esku bete opari banatzeko prest. Adierazi digutenez, txartel guztiek opari segurua izango dute. Alegia, tonbolara gerturatzen bazarete, ezinezkoa izango da handik esku hutsik joatea. Txartelak euro batean egongo dira salgai.
Opari zerrenda amaigabea
Luzea, oso luzea da Gattunk Tonbolak banatu nahi dituen oparien zerrenda. Antolatzaileek aurreratu digutenez, Real Sociedad taldeko kamisetak, DVD-ak eta musika CD-ak, Gattunk markako arropa, Donostiako Aquarium eta La Perlarako sarrerak, kotxe telegidatuak, Irrien Lagunak taldekoen produktuak, mallotak...
Boluntario taldea osatua dute tonbolakoek. Larunbatean muntatuko dute azpiegitura. Eta igandean, aurreko edizioetan bezala, festa giro ederrean sariak eta ilusioa oparitzera.
Gattunk Tonbola
Eguna: urriak 4, igandea.
Ordutegia: 09:00-20:00.
Tokia: Oiardo Kiroldegi atariko plaza, #Kilometroak15 ekimeneko 1.gunea.