Bi hitzaldi programatu dituzte Nafartarrak taldekoek, urriaren 21 eta 22rako, arratsaldeko 19:00etan Sutegiko auditorioan:
Urriak 21, asteazkena
19:00 Hitzaldia Sutegin: "Euskararen isobarak".
Hizlaria: Pako Aristi.
Zehaztasunak: "Liburu hau zaplazteko bat da diskurtso desideologizatuen aurpegian; kolpe bat gogoeta alienatuen mahai gainean. Astindua, eta ondoren, katarsia. Hori guztia estilo bizian idatzia, istorio, pasadizo, aipu eta gogoeta zorrotzak erabiliz.
Koldo lzagirrek gure hizkuntzan artseniko aztarnak aurkitu zituen bezala, Pako Aristi euskararen inguruko diskurtsoa kutsatzen duten gezurrak detektatzen saiatu da liburu honetan: euskara politizatua dagoela, ez dela modernoa, subentzionatua dagoela, erakargarritasuna falta zaiola... Horretarako mila urteko historia marrazten du, Nafarroako Erresumaren garaitik hasi eta gaurdaino euskarak jasan duen endekapen planifikatua deskribatuz.
Botere hegemonikoak, berez bereizia zen lurralde bat menderatu duenean, gezurrak asmatzen baititu bere aurpegia ederresteko, eta menderatua konplexuz betetzeko. Gero gezurrok inposatzen ditu, eta guk irentsi egiten ditugu, azkenik, gezurren gainean eraikitako ekimenak antolatzeko. Liburu pertsonala, guztiz, baina herri baten hatsa jaso nahi duena".
Urriak 22, osteguna
19:00 Hitzaldia Sutegin: "Umorea eta politika".
Hizlariak: Asisko Urmeneta, Olaia Aldaz eta Uxoa Anduaga.
Zehaztasunak: "Umorea ospe oneko kategoria da. Zoriona, osasuna, munduko bakea edo maitasuna bezain estimatua dela esango genuke. Hala ere, umoreak ertz asko ditu. Barru-barruraino iristen zaigu, eta zorroztasuna, asmo txarra, minberatasuna edo sentimenduak ditu bidelagun. Ez beti onerako, gainera. Izan ere, umorea sarriegi erabili izan da iseka egiteko, barregarri uzteko, mespretxatzeko, zauritzeko...
Eta zer gertatzen da kolektibitate, gizarte-talde, herri edota boterearen beraren espazioan kokatzen garenean? Arma politikoa izan daiteke umorea? Nola ulertzen dugu juduei buruzko umorea –haien sarraskiaren aurretik–, ijituei buruzkoa edota guri, euskaldunoi buruzkoa? Nabarraldek Haria aldizkariaren ale bat plazaratu zuen kontu horiei buruz. Orain, gogoeta horretan parte hartu zutenetako batzuk, Asisko Urmeneta, Olatz Aldaz eta Uxoa Anduaga alegia, mahai-inguru batean izango ditugu, gai korapilatsu horretan sakontzeko".
Antolatzailea: Nafartarrak.