Antolatzaileek sare sozialen bidez berri eman dutenez, bertan behera geratu da larunbat iluntzerako, "Marisa eta Aitzaga Libre" lemapean egitekoa zen giza-katea. Deitzaileek aipatu dutenez, "Bart Parisko gertaerak batetik eta epaiketaren atzerapen berria bestetik, abenduak 3an hasiko da, gaurko deialdia azaroak 28ra atzeratzea erabaki dugu".
Abenduaren 3rako finkatu dute beraz, 04/08 sumarioari lotuta, Espainiako Auzitegi Nazionalean Ezker Abertzaleko 35 kideren aurka hasiko den epaiketa data. Auziperatuen artean da, Marisa Alejandro usurbildarra.
Epaiketa, 8 urtera
Baltasar Garzon epailearen aginduz, 2007ko urriaren 4an Seguran Ezker Abertzalearen aurka izandako polizia operazioaren haritik dator azaroaren 16an hastekoa den epaiketa. Ezker Abertzaleko 23 lagun atxilotu zituen polizia espainiarrak duela 8 urte, tartean, Marisa Alejandro usurbildarra. Batasunaren mahai nazionala berriro osatu izana leporatu zitzaien. 23 lagunon etxeak eta EHAK alderdiaren egoitza miatu zituzten.
Egun haietan, atxiloketok salatzeko mobilizazio ugari burutu ziren bai Usurbilen, baita Euskal Herri mailan ere; tartean, jarraipen zabala izan zuen ordubeteko lan uztea egin zen.
Marisa ia 3 urte izan zuten preso, 2010eko apirilaren 15ean, bera eta polizia operazio berean atxiloturiko beste 9 lagun bermepean aske utzi zituzten arte. Aske geratu eta 5 urtera epaituko dute Marisa, beste 34 lagunekin batera.
Aitzaga, konfiskatze aginduaren zain
Aitzaga eta beste ehunetik gora elkarte, konfiskatze aginduaren zain dira, ekainean Espainiako Auzitegi Gorenak, Herriko Tabernen aurka Auzitegi Nazionalak kaleraturiko epaia berretsi ostean. Epaiak ordea, ez zuen oso argi uzten, ez noiz ezta nola gauzatuko zen. Epaia ekainean kaleratu arren, momentuz zabalik segitzen du herriko tabernak eta elkartearen egoitzak.
12 urtetik gorako ibilbide luzea du halere, auzi honek. Lehen ere itxia egon da Aitzaga, sei urtez, 2006tik 2012ra. Itxia bai baina ez isildua. Egoitzarik gabe ere, aurten 21 urte bete dituen elkarteak bizirik eta lanean jarraitu baitu.
