Joan den larunbatean Usurbilgo Sutegin Nafartarrak kultur taldeak antolaturiko hitzordu garrantzitsua zegoen, Iñaki Agirrerasobek helarazi digun ondoko kronikan gogorarazten digun moduan. "Zuberoako Dominika, dela gutxi zendu zena, omentzeko parada zegoen. Usurbil eta Urdiñarbeko herrien arteko 20 urteko harremana ez zen ahuntzaren gauerdiko eztula. Urte luzez bizkar hezurra suertatu zena, ustekabean itzali zen urrian, baina bere argindarrak jarraipena izateko omenaldi bero eta sutsua izan zuen leporaino beterik zegoen aretoan. Lehenik, maskaradako xorrotxak gogoratuaz, Pello Zubiria eta Joseba Tapia aritu ziren. Usurbilgo kontuak aipatu zituzten.
Bestalde, Bordaxarren laukoteak ahots gozoz abesturiko kantuak eskaini zituen. Ondoren, Iñaki Agirresarobek eta Kerman Rekondok bi herrien arteko harremana gogoratzeko bertso bana abestu zituzten.
Artzain prestua ta langilea
gainera amesgarria,
hire ezpainetan heraman beti
alaitasunez irria,
Urdiñarbe ta Usurbilekin
mantenduaz lokarria,
abesti franko izango dituk
beti denen euskarria
zabalduaz azkorria.
Zure bizitza eman zenion
bihotzez Zuberoari,
bere dituen nekazaritza
kultur eta kirolari,
lokarri batez korapilatuz
gure Euskal Herriari,
ta orain heldu behar diogu
zuk utzitako lanari,
zure irriak jarraitu dezan
Euskal Herrian kantari.
Jarraian Usurbilgo dantzariak, Mixel Etxekopare eta Bedaxagar aritu ziren. Omenaldi hunkigarria, beroa eta xaloa gertatu zen. Xiberotarren izenean Jargo Etxeberri aritu zen hizketan eta eskerrik beroenak jaso zituzten bildutakoek.
