Azaroan jendaurrean aurkeztu zuten usurbildar eta zubietarrez osaturiko Erraustegia Erabakia plataforma erraustegiaren inguruko galdeketa egitea eskatzeko sinadurak biltzen aritu da azken hilabeteotan. Guztira, 1.185 usurbildarren atxikimenduak jaso dituzte. "Helburutzat markatu genuen sinadura kopurua erraz gainditu dugu", zioten plataformako kideek, bildutako sinadura guztiok Usurbilgo Udalari emateko, larunbatean udalbatza aretoan egin zen ekitaldian.
Zorion eta esker hitzak baino ez zituzten, ekimenean parte hartu zuten herritar guztientzat. Txalo artean entregatu zizkioten Udalari, 1.185 atxikimenduak edo euren esanetan, "erraustegia bozkatzeko 1.185 arrazoi".
Erraustegia Erabakiak Udalari egiten dion eskaria argia da; "galdetu herriari ea erraustegia egitea nahi duen ala ez". Bildutako sinadurak Udalari eman aurretik, plataformako kide batek honako adierazpen hau irakurri zuen:
1.185 arrazoi erraustegia bozkatzeko
Baztertuta zegoen erraustegiaren egitasmoa, Gipuzkoako Foru Aldundiko agintari berriek berpiztu eta eraikitzeko asmoa agertu dute. Kezka eta gatazka, hasiera hasieratik, instituzioetan baino kaleetan egon da. Erraustegi hori, guk, herritarrok, ordaindu beharko genuke gure osasunarekin eta gure diruarekin, baina inork ez digu galdetu ea erraustegia nahi dugun ala ez.
Bada garaia gizartean hainbesteko polemika harrotzen duten gaietan herriari hitza emateko. Kultura demokratikoan sakondu behar dugu: agintariek, herriari erabakitzen uzteko ohitura hartu behar dute. Hori bultzatzeko, hainbat zubietar eta usurbildar elkartu ginen joan den azaroan, eta erraustegiaren gaian gure ahotsa entzunarazteko sinadurak biltzeari ekin genion. Gaur, 1.185 herritarrek bere enkargua ematen diote Usurbilgo Udalari: galdetu herriari ea erraustegia egitea nahi duen ala ez.
Garaiak aldatzen ari dira, herria ez da asetzen 4 urtez behin bozkatuta. Arazo bat instituzioen geletatik kalera ateratzen denean, erabakitzeko esparrua ere mugitu egiten da. Gipuzkoako agintariek ez dute oraindik hori ulertu. Usurbilen, bertakoek bertan eragitea erabaki dugu, eta, gaur, 1.185 arrazoi eman diegu ulertarazteko.
Zorionak eta milesker sinadurak biltzen eta ematen parte hartu duzuen herritar guztioi. Helburutzat markatu genuen sinadura kopurua erraz gainditu dugu eta!!! Hemendik aurrerako erraustegiaren inguruko ekimenetan ere ikusiko garelakoan... Berriz ere zorionak!
Erraustegia: Herriak Erabaki!
Erraustegia Erabakia
Herritarren mandatua betetzeko, Udala "egin ahalak eta bi egiteko" prest
Erraustegiaren inguruko herri galdeketa antolatzea eskatzeko, hilabeteotan bildutako 1.185 usurbildarren sinadura entregatu zizkion Erraustegia Erabakia plataformak Usurbilgo Udalari, larunbatean udalbatza aretoan ospatu zen ekitaldian.
Pozik eta galdeketa antolatzeko gogoz jaso ditu Udalak, usurbildarren eskaerok. Xabier Arregi alkateak adierazi zuenez, "eskaera bat egin diguzue, kontsulta bat antolatzeko, Usurbilek erraustegia egin nahi duen edo ez erabakitzeko eta guretzat eskaera hori mandatu bat da, agindua da. Herriak eskatzen duena hona iritsitakoan, guretzat mandatuan bihurtzen da eta egin ahalak eta bi egingo ditugu mandatu hori aurrera eramateko".
Udal barruan adostasunak biltzen saiatuko direla adierazi zuen, bidean sor daitezkeen arazoei aurre egiten saiatuko direla baita, "azken batean herri kontsulta eraginkor bat egiteko".
Usurbil, "herri konprometitua"
Hilabeteotan bideratu den sinadura bilketa kanpainan parte hartu duten herritar guztiak zoriondu nahi izan zituen. "Gure ustez hemen erakusten da berriz ere, Usurbil herri aktiboa, herri konprometitua dela. Gertatzen zaizkigun arazoekin kezkatu eta irtenbideak proposatzen dakien herria dela", alkatearen esanetan.