Azken egunotan, bolo-bolo ibili da Argiak sare sozialen bidez zabaldu duen bideo bat; Anbereseko erraustegian izandako leherketa jasotzen duen bideoaz ari gara. Otsailaren 26an gertatu zen leherketa ikaragarria. Pello Zubiria aginagarrak idatzitako artikuluak jasotzen duenez, hondakin industrialak erretzen zituzten bertan. Leherketak hiru sute eragin eta suteok amatatzeko lau ordu behar izan omen zituzten. Leherketa, hondamendi egoera gisa definitu zuten suhiltzaileek.
Leherketa hau ordea, antza ez da izan, han eta hemen lanen ari diren erraustegietan jazo den istripu bakarra. Osasuna eta Errausketa Ikerketa Taldeak, 2007-2013 urte artean erraustegietan izan diren istripuen zerrenda bat argitara eman du. Frantsesez dagoen dokumentuak, leherketa edota sute ezberdinen berri jasotzen du: erraustegietako istripuen zerrenda
"Gipuzkoan ez dugu horrelakorik nahi"
Kezka eta haserrea eragin du azken egunotan sare sozialetan, otsailaren 26an Anberesen (Flandria) kokatua dagoen erraustegian izandako leherketa ikaragarriak. Sare sozialetan bolo-bolo dabilen bideo eta albisteak, denetariko erreakzioak eragin ditu erabiltzaileen artean. Bertako hedabideen isiltasuna salatzen ari dira hainbat lagun. "Zergatik ez da medioetan albiste?" galdetzen dute. Halere, kezka nagusi, beste hainbat mezuetan; "eta gero esango digute ez dela arriskutsua". Edozein kasutan, albiste honek indartu egin du beste behin, errausketaren aurkako aldarria. "Gipuzkoan ez dugu horrelakorik nahi!", adierazi du beste hainbat erabiltzaileren artean, Osasuna eta Errausketa Ikerketa Taldeak, Facebook bidez. "Atzora arte ez genuen jakin otsailaren 26an Anbereseko (Belgika) erraustegia lehertu zela, hemengo komunikabideetan ez dutelako ezer argitaratu (Argian izan ezik). Errefusaren botere kalorifiko baxuagatik, zaborra erre ahal izateko gasa erabiltzen da eta honek eragin du leherketa. Gipuzkoarron ekonomian eta osasunean erraustegiak suposatzen duen arriskuaz gain, leherketa arriskua ere badu! Gipuzkoan ez dugu horrelakorik nahi!", adierazi dute ohar bidez.
Errausketaren aurkako agenda
Erraustegiaren aurkako ekimenek ez dute etenik. Usurbilen, apirilaren 15erako errausketaren aurkako ekimenak antolatzen dabiltza. Momentuz, honatx aurreratu diguten egitaraua:
Apirilak 15, ostirala, Udarregi Ikastolako jangelan:
19:00 Jakoba Errekondoren hitzaldia "Bizi baratzea".
20:30 Afari herrikoia borondatearen truk.
Ondoren, "Hil ondoren erraustuko ez dituzten kantarien biltzarra".
Maiatzak 21, larunbata
Maiatzaren 20tik 22ra, proiektu suntsitzaileen (tartean erraustegiaren) aurkako Txirrinka bizikleta martxa gure artetik igaroko da, "Lurra zaindu, eredu soziala eraldatu! AHT eta proiektu txikitzaileak borrokatu!" aldarripean.
Informazio gehiago: http://ahttxirrinka2016.blogspot.com.es
