2o15eko diru-kontuak argitzeko garaia heldu da. Apirilaren 11n abiatuko da, 2015eko Errenta aitortzeko kanpaina. Momentuz, ostiralaz geroztik autolikidazio proposamena jasoko duzuen edo ez egiaztatzeko aukera duzue helbide honetan: Autolikidazio proposamenak
Autolikidazio proposamena jasoko dutenek, asteazken honetatik aurrera ikusgai izango dute, lotura berean autolikidazio proposamena. Eskutitz bidez ere helaraziko zaie herritarrei, Ogasunak gaur bertan hasiko duen bidalketarekin. Aldundiak dituen aurreikuspenen arabera, 200.000 proposamenetik gora bidaliko dituzte etxeetara. "Azken kanpainan 238.811 proposamen bidali eta haietatik 213.444 onartu ziren, hau da, bidalitakoen %89,4", Gipuzkoako Foru Ogasunetik berri eman dutenez.
Egutegia
2015eko Errenta Aitorpena tramitatzeko epea, datorren astelehenean, apirilaren 11n irekiko da. Honatx kontuan hartzeko zenbait data:
-Apirilaren 6tik aurrera: autolikidazio proposamenak Ogasuneko web orrialdean ikusteko aukera. Proposamenok eskutitzez bidaltzen hasiko da Ogasuna.
-Apirilak 11-ekainak 25: autolikidazio proposamenak onartzea. Onartzeko bideak: 902 100 040 edo Ogasuna
-Apirilak 15-ekainak 6: errenta mekanizaturako hitzordua eskatzea (autolikidazio proposamena jaso dutenek, apirilaren 19tik aurrera). Oharra: epea luzatu daiteke, ordu libreak egonez gero.
-Apirilak 18-ekainak 25: aitorpenak aurkezteko epea.
Informazio gehiago eta hitzorduak eskatzeko: 902 100 040 edo gipuzkoa.eus/ogasuna
Hobaria, NOAUA!ko bazkideontzat
Aurten 20 urte beteko dituen NOAUA! Kultur Elkarteko bazkide izateak abantaila bat baino gehiagoz gozatzeko aukera eskaintzen du. Baita urtemuga berezi honetan ere. Adi, zuetako askok hilabete honetatik aurrera tramitatu beharko duzuen Errenta Aitorpenari. NOAUA!ko bazkide zaretenoi hobaria aplikatuko zaizue, iaz NOAUA!ko bazkide izan eta zuen izen abizenak eta NAN zenbaki osoa (letra eta guzti) eman diguzuenoi bai behintzat. Hala egin ez duzuen bazkideok, datorren urteko errenta aitorpenean NOAUA!ko bazkidetza kontuan hartzea nahi baduzue, hobaria aplikatzea nahi bazenute alegia, deitu 943 360 321 telefono zenbakira, idatzi elkartea@noaua.eus helbidera edo etorri NOAUA!ko egoitzara, eta eman zuen izen abizenak eta NAN zenbaki osoa, letra eta guzti.
