LOMCE-ren aurkako guraso taldeak ezagutzera eman duenez, LOMCE probarik ez dute egingo aurten. "Pasa den urrian, LH 3ko eta LH 6ko gurasooi LOMCEko kanpo-azterketei planto egiteko eskatu genizuen. Ez da arrazoirik falta horretarako, proba horiek antipedagogikoak eta hezkuntza-eragileen adostasunik gabe ezarriak baitira, gure hezkuntza-sistemaren hainbat lorpen arriskuan jartzen baitituzte.
Maila horietako familiok, banatutako atxikimendu-orrien bitartez, proben kontrako jarrera garbia erakutsi duzue. LH 3n %60tik gora gurasok orria sinatu eta babesa erakutsi duzue; LH 6n, berriz, %70tik gora.
Dagoeneko Eusko Jaurlaritzak LH 6ko proba aurten ez egitea erabaki du. LH 3koari dagokionez, egitearen erabakia ikastetxeen esku utzi du. Haiek proposaturiko azterketa-ereduak edo ikastetxeek beraiek ezarriko dituztenak erabili ahalko dira.
Argudioak argudio eta gurasoen erantzuna kontuan harturik, Udarregi Ikastolak LH 3ko kanpo-azterketa ez egitea erabaki du.
LOMCEren kontrako guraso-taldea".
"DBH bukatu eta gero zer?"
Galdera horri erantzuteko bilera sorta antolatu du Udarregi Ikastolak aste honetarako. "Urtero bezala, aurten ere, orientazio departamenduak DBH bukatu ondoren egin daitezkeen ikasketa eta lanbide-irtenbideei buruzko bilera batzuk antolatu ditu", ohartarazi dute. Hemen hitzorduon agenda:
Apirilak 11, astelehena
17:00 Donostiako Santo Tomas Lizeoa (Batxilergoa).
Apirilak 12, asteartea
17:00 Oteitza (Zarautz, Batxilergoak eta Lanbide-Heziketako zikloak).
18:00 Zubietako Lanbide Eskola (Lanbide-Heziketako zikloak).
Apirilak 13, asteazkena
17:00 Donostiako Zurriola+Barandiaran (Batxilergoak eta Lanbide-Heziketako zikloak).
Apirilak 14, osteguna
17:00 Lasarteko Institutua (Batxilergoak).
Oharrak:
-Bileren tokia: DBHko eraikineko bideo-gela.
-Bilerak, euskaraz eta gaztelaniaz izango dira.
Informazio gehiago: udarregi.eus
Ingeles udalekuak antolatu ditu Udarregi Ikastolak
2004-2010 urte artean jaiotako gaztetxoentzako ingeles udalekuak antolatu ditu Udarregi Ikastolak, ekainaren 27tik uztailaren 22ra. Ohartarazi dutenez, "jatorrizko ingeles hiztunak diren hezitzaileek gidatuta". Ingeles udalekuotan izen emateko epea zabalik egongo da apirilaren 23ra arte. Apuntatzeko, gerturatu ikastolako idazkaritzara.
Izena emandako ikasle kopuruaren arabera zehaztuko da udalekuotako prezioa. Baina antolatzaileek aurreikusten dutenez, gutxi gorabehera 300 eurokoa izango da gastua. Doakoa, hezitzailea etxean hartzen duen familiarentzat. Adin tartearen araberako bi multzo hauetan banatuko dira ikasleak:
A taldea: 2o08-2010 urte artean jaiotako haurrentzat.
B taldea: 2004-2007 urte artean jaiotako haurrentzat.
Ikastolen Elkartearen eskaintza
Ingeles udalekuoz gain, Udarregi Ikastola kide duen Ikastolen Elkarteak ere uda parterako aisialdi eskaintza zabala prestatu du; atzerriko egonaldiak, gazte egonaldiak, mendia eta pilota udalekuak, itsasoa, kultura edota surf udalekuak, udaleku ireki eta ibiltariak... Ekintzok 3-18 urte arteko haur eta gazteei zuzenduak daude. Matrikulazio epea zabalik egongo da, maiatzaren 6ra arte. Argibide gehiago: aisialdia.eus