"Errausketa zaharkitutako teknologia da, etorkizuneko baliabideak alferrik galtzen dituena. Era berean, kutsadura iturri haundia da, eta ondorioz, gure osasuna eta ingurugiroa babesteko beharra daukagu. Errauskailua baldin badaukazu, ez dago baliabiderik gaikako bilketarako eta praktika onetarako. Errausketa iragana da, eta etorkizuna behar dugu! Era berean, beharrezkoa da baliabide natural eskasiari aurre egitea, materialak berreskuratuz, eta ez, errez". Hala zioen Rossano Ercolini, Zero Waste Europe mugimenduko lehendakariak, berriki Urumeako Kronika egunkariari eskaini dion elkarrizketa batean.
Errausketa, hondakinak kudeatzeko biderik txarrena dela dio, baztertu beharrekoa. "Errausketa da zaborra kudeatzeko biderik txarrena; oso garestia da, ez du lanposturik sortzen komunitatearentzako eta 30 urtetarako eraikitzen baduzu, hura elikatu behar duzu, eta ondorioz, birziklatzea eta konposta egitea baztertzen duzu. Osasun arazoei dagokienez, berriz, saihestu badaiteke, arriskurik txikiena hartzea ere ez da onargarria. Beraz, osasuna, ingurugiroa eta ekonomiarentzako errausketa baino aukera hobeak badaude, zergatik sustatu enpresa batek bultzatzen duen horrelako teknologia garestia?", galdetzen du.
Goldman Price saria
Ercolini, ofizioz maisua da lehen mailako eskola batean. Erraustegiaren aurkako borroka duela 20 urte baino gehiago abiatu zuen. 1994an, bere sorterrian, Italiano Capannorin eraiki nahi zuten erraustegiaren aurkako "Ambiente e Futuro" talde txikia sortu zuen. 1996an zero zabor aldarria zabaltzen hasi zen eta sorterria, Europako lehen Zero Waste (Zero Zabor) udalerri bilakatu zen. Hortik sortuko zen gerora Italiako Rifiuti Zero mugimendua, egungo Europako indartsuena. Ercolinik Goldman Price saria jaso zuen bere lanagatik 2013an. Berrikitan liburu bat atera du “Ez dezagun etorkizuna erre” tituluarekin. Lehenago gure artean izana da Ercolini, gai honi buruz antolatu izan diren jardunaldietan. Asteburu honetan itzuli da.
Bisitan
Larunbatean Hernaniko Biteri kultur etxean "Ez erraustu etorkizuna. Zero Zabor da bidea" hitzaldia eskaini zuen Ercolinik. Asteburu pasa honen baitan, bisitan izan dugu igande goiz honetan Usurbilen. Lehenbizi, errausketaren zero gunera igo da, Usurbilgo Udaleko, Zubietako Herri Batzarreko, Hernanin Zero Zabor taldeko edota Erraustegiaren Aurkako Usurbilgo Taldeko kideekin batera. Gertutik ikusi ahal izan du, une honetan erraustegia egiteko gunean dagoen zulo puska. Usurbila jaitsi dira gero. Sorterrira itzultzeko hegaldia hartu aurretik, udalerri honetako hondakinen kudeaketa eredua ezagutzeko aukera izan du Ercolinik.
