34 udalerrik abiatu dute, 2017an Usurbil ere batuko den erabakitze aroa

Euskal Herria bere etorkizuna erabakitzen hasia da. Erabakiaren aroan sartu gara, igandean 34 udalerritan ospatu ziren galdeketen ostean. 36.884 herritarrek eman dute jada bozkatzeko urratsa. Goierrin eta Ispasterren "Nahi duzu euskal estatu burujabe bateko herritarra izan?" galdetu zieten herritarrei. Debagoienan eta Azpeitian "Nahi al duzu izan euskal estatu independente bateko herritar?". Guztietan baiezkoa nagusitu da. Oro har, %95,2ak (35.174 lagunek) baietz erantzun du. Udalerriaren arabera datu ezberdinak dauden arren, oro har, %30aren bueltakoa izan da parte hartzea. Hainbat udalerrietan %50eko muga gainditu du parte hartzeak, eta batzuetan %70etik gorakoa izan da. Gure Esku Dago mugimendutik poza agertu dute. "Lorpen handia da, jauzi kualitatiboa". Bide luzea jorratzeke dagoen arren, zailena gai hau mahai gainean jarri, herritarrak batu, elkarrengandik ikasi, prozesua eta galdera adostu eta erabakiraino gauzatzea dela zioten. "Eta horixe da hain zuzen egin duguna", zioten bart, Gure Esku Dago mugimendutik.

2017an Usurbilen

Gogoan izan, hurrengo urtebetean beste 60 udalerrietan ospatzekoak dira galdeketak. Beste 250.000 herritar deituko dituzte galdeketetara:

-2017ko martxoaren 19an Tolosaldeko 28 udalerrietan eta Oiartzualdean.

-2017ko martxoaren 26an Larrabetzun.

-2017an zehar: Gipuzkoako Usurbilen, Hernanin, Getarian edota Zumaian; Bizkaiko Orozkon, Larrabetzun, Leioan, Aulestin, Arrigorriagan, Bermeon, Barrikan, Busturian, Elorrion, Sopelan, Lemoizen, Urdulizen; edota Nafarroako Sakanan. Hauei udalerri gehiago batuko zaizkie laster.

Galdeketen emaitzak