Igande honetan eguerdiko 12:00etan hasita, giza-kate modukoa egingo da Donostian. Antiguako tuneletik abiatuko da eta, Kontxako pasealekuan barrena, Alderdi Ederrean amaituko da. Ekitaldi bat egingo dute amaieran. Desfile gisakoa izango dela adierazi dute gaur Donostian eskaini duten prentsaurrekoan. Gurasoei eta jende helduari beltzez joateko eskatu diete eta gaztetxoei, zuriz.
“Gure haurrak babestuko dituen hesia izan nahi dugu gurasook”. Hala adierazi du Joxemari Izetak, GuraSOS taldeko bozeramaleak. “Gure haurrak eta gure gaztetxoak babestuko ditugu. Ez diegu hutsik egingo, gu gara euren hesi-babeslea”. Alderdi Ederreko ekitaldian, osasuna aldarrikatu eta gaia despolitizatzea eskatuko da. “Gizarteari bueltatu behar zaio ardura, eztabaida eta erabakia. Horretarako beharrezkoa da informazio zuzena, independientea, kontrastatua jasotzea. Horrek emango digu benetako erabakiak hartzeko bidea”. Liskar eskenatokiak alde batera utzi eta adostasuna bilatu behar dela adierazi du GuraSOS taldeak.
Parte-hartze prozesua zabaldu asmoz, ekimen juridikoa jarri dute martxan
Legea baliatuz, erraustegiari buruzko parte-hartze prozesua irekitzea eskatu du GuraSOS taldeak. Eta horretarako ekimen juridikoa jarri dute martxan. Gaia liskar politikotik atera eta eztabaida gizarteari bueltatzeko garaia dela uste dute. Horregatik, parte-hartze prozesu hori, “ osoa eta benetakoa” izatea eskatu du gaur prentsaurreko bidez GuraSOS taldeak. “Gure haurren osasuna jarriko dugu gure lehen interes moduan. Osasuna guztiz bermatuta ez dagoelako”.