Eguna gerturatu ahala hazten doa atxikimenduen zerrenda. Astelehen honetan, Usurbilgo udal langileek adierazi diote babesa, Errausketaren Aurkako Mugimenduak larunbat honetarako, martxoak 25, deitu duen manifestazioari. Arratsaldeko 17:00etan abiatuko da Anoetatik Bulebarrerantz, "Alternatiba dagoelako, errausketarik ez" aldarripean.
Ingurumen, hezkuntza, parekidetasun, kultur edota kirol eremuan lanean diharduten eragileak, sindikatuak, alderdi politikoak... Guztira jada 80 eragileek baino gehiagok babesa adierazi diote, herri mobilizazio handia izatea nahi duten manifestazioari. Segidan duzue, momentuz, bilduak dituzten atxikimenduen zerrenda. Hazten segi dezake zerrendak, babesa adierazteko epeak zabalik segitzen baitu.
Herritar eta eragileen agerraldia egin zuten larunbatean
"Garaiz gaude oraindik gauzak ondo egiteko", gogorarazi zuen Errausketaren Aurkako Mugimenduak larunbat eguerdian, Donostiako Anoeta futbol zelaian egindako agerraldian. Bertan bildu ziren norbanako nahiz eragileek, babesa adierazi eta bultzada eman nahi izan zioten, larunbat honetako manifestazioari.
"Alternatiba dagoelako, errausketarik ez" aldarripean egingo den mobilizazioak Donostia erdiguneko kaleak zeharkatuko ditu Bulebarreraino. "Manifestazio handia izatea nahi genuke. Hor bilduko gara "erraustegirik ez" esateko eta beste jendarte eredu bat aldarrikatzeko", iragarri dute. Gipuzkoako Foru Aldundian agintean diren alderdiei mezu argia helaraziko zaie hilaren 25ean. "Gelditu ezazue proiektua, hartu ezazue hondakinen kudeaketa onaren norabidea. Egin kasu herritarrok eskatzen dizuegunari", aldarrikatuko da.
"Errausketak badauka alternatiba"
Aipatu moduan, errausketa alboratzen duen alternatibaren aldeko herri mobilizazio handia izatea nahi dute deitzaileek. "Errausketak badauka alternatiba, demostratua dago alternatibak balio duela eta Gipuzkoan erraustegirik gabe ondo kudeatu ditzakegula gure hondakinak", adierazi zuten larunbateko agerraldian.
Bestelako hondakinen kudeaketa eredu hau nola gauzatu ere zehaztua du Errausketaren Aurkako Mugimenduak, martxoaren 9an aurkeztu zuen alternatiban argi utzi zutenez. Hondakinen gaikako bilketa eraginkortuta, hondakin gehienak aprobetxatu, erreus kopurua ahal bezain beste murriztu eta errausketa alboratzen duen bestelako tratamendu bat emanda.
Administrazio eta udalerrien laguntza, ezinbestekoa
Alternatiba hau gauzatzeko ordea, udalerri askok hasitako bideari gainerako udalerriak batzea ere ezinbestekotzat jotzen du Errausketaren Aurkako Mugimenduak, "ez baita onargarria batzuek 50 kg errefus azpitik botatzea, pertsonako eta urteko, eta beste batzuek 250 kg edo 300 kg botatzen segitzea. Ez da onargarria eta ez da justua".
Administrazioak bide honetan lagundu behar duela diote. Baduela zereginik, "hasteko, gaika ondo biltzeko sistema eraginkorrak ezartzen Gipuzkoa osoan, eta era berean gaika ondo bildutako hondakinak ondo tratatzeko azpiegiturak prestatzen. Urgentziazkoa da Gipuzkoak dagoenekoz organikoarentzako dauzkan azpiegiturak hobetzea eta behar diren berriak sortzea".
Atxikimendu zerrenda luze bezain anitza
"Era askotako erakunde, elkarte, talde eta herritarrok adierazi dugu, dagoeneko, gure babesa. Ez dugulako errauskailurik nahi ez Zubietan eta ez inon. Ez dugulako gure hondakinak tratatzeko azpiegitura garesti, kutsakor eta alferrikakorik nahi. Ez dugulako nahi gure eta gure ondorengoen osasuna kaltetzerik, ez dugulako nahi gure dirua xahutzerik ezta enpresa multinazionalek gure diruarekin negozioa egin dezaten, aldi berean herritarrontzako premiazko zerbitzu publikoak murriztuz", adierazi zuten larunbat eguerdian, hilaren 25eko herri mobiliazio handia abiatuko den gunean, Donostiako Anoeta futbol zelaian Errausketaren Aurkako Mugimenduak deituta, hainbat herritar eta eragileek parte hartu zuten agerraldian.
Errausketak alternatiba baduela gogorarazi zuten, frogatua dagoen moduan baliagarria, merkeagoa eta osasuntsuagoa dena gainera. Bestelako hondakinen kudeaketa eredu hau nola gauzatu ere zehaztua du Errausketaren Aurkako Mugimenduak, martxoaren 9an aurkeztu zuen alternatiban argi utzi zutenez. Hondakinen gaikako bilketa eraginkortuta, hondakin gehienak aprobetxatu, erreus kopurua ahal bezain beste murriztu eta errausketa alboratzen duen bestelako tratamendu bat emanda. Horregatik galdetzen zuten, "zer dela eta gastatu behar ditugu 212 milioi erraustegia eraikitzen eta 700 edo 1.000 milioi, horiek kudeatzen?".
Deialdiak
-Atxikimendu bilketa kanpainan parte hartzeko deia. Hemen duzue sinatzeko orria: errausketarik ez
-Eragile bakoitzak bere aldarrikapenekin eta martxoaren 25eko manifestaziora gonbidatuz, bideo labur bat grabatu eta oinarri sozialean zabaltzeko deia egin dute.
Martxoak 25, larunbata
17:00 Erraustegiaren alternatiba babesteko herri mobilizazio handia, Donostiako Anoeta futbol zelai paretik Bulebarrera. Manifestazioaren baitan "mikro manifestazio" desberdinak egongo direnez, haien aldarrikapenak zabaltzeko makildun pankartekin agertzeko deia egin diete eragileei.
Deitzailea: Errausketaren Aurkako Mugimendua.
Atxikimenduen behin behineko zerrenda
- AHTrik ez
- Aizan feminista taldea
- Aiztondo klasika
- Aiztondo plataforma
- Aiztondo Txirrindulari Elkartea
- Alternatiba
- AltzaXXI Herri Ekimena
- Amasako Martina Kultur elkartea
- Andoaingo Banda Errepublikarra
- Andoaingo Gaztetxea
- Andoaingo Punttuka Bertso Eskola
- Anoetako Gazte Asanblada
- Anoetako Neska Gazte Feministak
- Aralar
- Argia
- Askapena
- Asteasuko Atzapar Pilota Kirol Elkartea
- Asteasuko EBIA elkartea
- Asteasuko Matxintxulo gaztetxea
- Asvinenea Kultur Elkartea (Antzezleak biltzen dituen elkartea)
- Belartza 2 gelditu
- Billabonako Aizkardi Mendi Elkartea
- Billabonako Erniobea BHIko guraso elkartea
- Billabonako Oinkari Dantza Taldea
- Biolur Gipuzkoa
- CCOO sindikatua
- CGT sindikatua
- CNT sindikatua
- Debagoiena Eredu, Zabortegirik Ez plataforma
- Donostia Bizirik
- Donostiako Hondakinen Bilgunea
- Duintasuna elkartea (Gipuzkoako jubilatuak eta pentsiodunak)
- Eguzki
- EH Bildu
- EHNE
- Ekologistak Martxan
- ELA sindikatua
- EQUO
- Ernai
- Errausketaren Aurkako Koordinadora
- ESK sindikatua
- Ezker Anitza – IU
- Fleming Ikastetxeko Guraso elkartea
- Gasteizko Zero Zabor
- Gipuzkoa Zutik
- Greenpeace
- Haize Garbia plataforma
- Haritzalde Naturzaleen elkartea
- Hernaniko Berdintasun Kontseilua
- Hernaniko EH Bildu
- Hernaniko Kooperazio Taldea
- Hernanin Zero Zabor
- Herria Kultur Elkartea
- Hiru garraiolarien sindikatua
- Ikasle Abertzaleak
- Ipar Haizea
- Irabazi Donostia
- Jatorkin Atzerritarren aldeko elkartea (Tolosa)
- Karabeleko Baratza ekologikoak
- Komite Internazionalistak
- LAB sindikatua
- Lanbide Kaltetuak (Asociación de afectados por Lanbide)
- Lurreko Eko denda
- Medeak Feminista Taldea
- Nekane Libre
- OEIT /GEIS
- Onddo Gaztetxea
- Oñati Zero Zabor
- Podemos Donostia
- Podemos Euskadi
- Sortu
- Steilas sindikatua
- Stop Kaleratzeak Hernani
- Tolosaldeko Osasun Publikoaren aldeko plataforma
- Urnieta Bizirik
- Usurbilgo Aralar
- Usurbilgo EH Bildu
- Usurbilgo Ernai
- Zero Zabor ingurumen babeserako elkartea
- Zizurkilgo Erraldoi eta Buruhandien Konpartsa
- Zubietako Herri Ikastetxeko klaustroa eta jangelako langileak
Informazio gehiago: erraustuez.org
