Xabier Santxok GARFE enpresarekin kontratua sinatu du eta lehen partida Usurbilen jokatuko du. Usurbilgo Udalak antolatu duen partidan, Bergera izango da Usurbilgo pilotariaren bikotea. Titin III-Gorrotxategi bikotearen aurka lehiatu beharko dute. Partida arratsaldeko 19:00etan hasiko da.
Sarrerak, Txiribogan
Sarrerak Txiriboga tabernan eskura daitezke 10 euroren truke. Egunean bertan bestela, baina 12 eurotan.
Tiburtzioren omenez
Partidu honen ondoren, "Pagazpe Pilota Elkarteak Tiburtzio Arrutiri merezi duen omenaldia eskainiko dio pilotaren alde egin duen lanagatik".
Haurren Arteko Pilota Txapelketako finalak
Aurreko igandean, haurren arteko esku pilota txapelketako finalak jokatu ziren Usurbilgo frontoian. Bost maila ezberdinetako pilotariak batu ziren "eta frontoiak itxura polita hartu zuen bertan bildutako guraso, senitarteko, lagun eta pilotariengatik", Pagazpe Pilota Elkartetik aditzera eman digutenez. Emaitzak hauek izan ziren:
Benjamin txikiak
Manex Indakoetxea 16
Xabat Jauregi 15
Benjaminak
Axular Rekondo 16
Eneko Zabaleta 12
Alebinak I
Hugo Ramos 16
Enaitz Garcia 8
Alebinak II
Gorka Goikoetxea 16
Jon Galarraga 14
Alebinak III
Peru Erauntzetamurgil 16
Julen Begiristain 15
Partiden ondoren, luntxa
Partiden ondoren, "Txiriboga, Aitzaga, Txirristra, Bordatxo, Artzabal, Benta, Guria eta Txapeldun tabernek eskainiriko luntxaz gozatu zuten partidetara gerturatu ziren ikusle zein pilotariek", Pagazpe Pilota Elkartekoek eskerrak eman nahi dizkiete denei.
Zenbaki saritua: 11242
Igandeko partiden ondoren egin zen zozketan, hauxe izan zen zenbaki saritua: 11242. Iker Alduntzinek zuen eta berarentzat izan zen saria.