Udaberrian zehar hainbat lan uzte egin zituzten, unibertsitatez kanpoko hezkuntza publikoan, eremu honetan murrizketak aplikatzeari utzi, hezkuntzara inbertsio handiagoa bideratu edota langileen lan baldintzak hobetzea eskatzeko. Greba deialdiok erabateko jarraipena izan zuten besteak beste, Aginaga eta Zubietako eskoletan, ondoko artxiboko irudiek erakusten duten moduan. Irudiok udazkenean zehar errepika daitezke.
Eusko Jaurlaritzak aipatu aldarrikapenei erantzun ez eta "egoera larri honi buelta emateko inolako neurri zehatzik" proposatu ez duenez, mobilizazio gehiago deitu dituzte LAB, ELA eta STEILAS sindikatuek, hasi berri dugun ikasturte honetarako. Abenduaren 12rako greba eguna deitu dute. Baina aurrez beste hainbat ekimen, hilabete honetatik bertatik aurrera. Honatx hiru sindikatuok egin duten egungo egoeraren analisia eta iragarri dituzten mobilizazioen berri ematen duen agiria:
LAB, ELA eta STEILAS sindikatuen agiria
Pasa den ikasturtean EAEko unibertsitatez kanpoko hezkuntza publikoko sektore ezberdinetan eta haurreskoletan greba eta mobilizazio garrantzitsuak egin genituen, ikastetxeak, langileak, ikasleak eta familiak azken urteetan pairatzen ari garen egoera larria salatu asmoz eta egoerari buelta emateko ezinbestekotzat jotzen ditugun neurriak plazaratu asmoz. Eusko Jaurlaritzak, ordea, oraindik ez die gure aldarrikapenei erantzunik eman. Sektore ezberdinetako Negoziazio Mahaiak deitzeko ariketa formala egin duen arren, egoera larri honi buelta emateko inolako neurri zehatzik ez du ezarri mahai gainean.
Azken hilabetetan plazaratu moduan, LAB, ELA eta STEILAS sindikatuon ustez ondorengoak dira egungo egoerari irtenbidea ematen hasteko adostu beharrezko neurriak:
-Hezkuntza inbertsioa handitzea (gutxienez Europar Batasuneko bataz-bestekoa, progresiboki %6ra iritsiz).
-Plantilak gutxienez 2.000 langiletan handitzeko beharra.
-Bataz-besteko ia %40ko behin-behinekotasuna (%38 irakasleetan, %41 Haurreskoletan, %58 Heziketa Berezian eta %63 Sukalde eta Garbiketan), %6ra murrizteko premia. Horretarako 6.000tik gora lanpostu egonkortuz kolektibo ezberdinetan.
-Ikasle-ratioak %10 murriztea.
-Hezkuntzako langileen eroste ahalmena berreskuratzea.
-Ordezkapenak lehen egunetik egitea.
-Bajak lehen egunetik bere osotasunean ordaintzea.
-Erretiroa erraztu eta laguntzeko neurriak berreskuratzea.
-LOMCE Euskal Herriko gure ikastetxeetatik ateratzea eta honen moldaketa hutsa den Heziberri bertan behera uztea.
-Hezkuntzaren merkantilizazioa alde batera uztea, egungo desorekak gaindituz hezkuntza garapen pertsonal eta sozial integralerako tresna izan dadin (kohesio soziala, integrazioa, aniztasuna, berdintasuna, hezkidetza oinarri).
-Ikasle euskaldun eleaniztunak sortuko dituen euskarazko murgiltze eredua garatzea.
-Balizko Hezkuntza legearen aurrean sindikatu, hezkuntza eragile eta herritarron parte hartzea eta iritzia aintzakotzat hartzea.
Orain arte Eusko Jaurlaritzak ez du proposamen hauen inguruko benetako negoziazio asmorik agertu. Hau dela eta, uste dugu ikasturte honen hasieran ere, Hezkuntza Sailak greba eta mobilizazio dinamika mantentzea beste biderik ez digula uzten.
Irailetik aurrera elkarretaratzeak burutuko ditugu lurralde ezberdinatako Hezkuntza Ordezkaritzetan eta ikastetxeetan. Irailaren 20an Gasteizko Ama Zuriaren plazan hezkuntza publikoaren egoera eta beharren inguruko solasaldi irekia (world-kafe) dugu. Irailaren 28an ikastetxe, sektore ezberdinetako langile, ikasle eta familiek sufritzen duten egoera salatzeko ekimen bereziak egingo ditugu ikastetxeetan. Urrian zehar lurralde ezberdinetako hainbat ikastetxeetan itxialdiak burutuko ditugu batzar, mahainguru, solasaldi, kontzertu, antzezlan, errezitaldi eta antzekoak gauzatuz. Urriaren 28an familia eta herritarrekin batera manifestazioak burutuko ditugu Gasteiz, Donostia eta Bilbon. Azaroko aste bakoitzean sektore jakin bateko egoera eta aldarrikapenak plazaratzeko “borroka asteak” antolatuko ditugu, aste bakoitzeko ostegunean dagokion sektorean greba eguna deituz. Azkenik, abenduaren 12an sektore guztietan greba deituko dugu.
Sindikatuon ustez, ezinbestekoa da Eusko Jaurlaritza azken urte luzeetan inposatzen ari den murrizketak eta hezkuntza politika errotik aldatzea eta honek guztiak eraginda egungo hezkuntza publikoan eta haurreskoletan sufritzen ari garen egoerari buelta ematea.
Hezkuntza Sailari dei egiten diogu sektore ezberdinetako aldarrikapenak (irakasleak, Heziketa Berezia, Sukalde eta Garbiketa eta Haurreskolak) aintzat hartu eta benetako negoziazio prozesu bat abia dezala lan-baldintzak hobetu eta egungo gure hezkuntza publikoak dituen behar eta erronkei modu egokian erantzuteko.
Aginagako Eskola
