Dozenaka bolondres aritu ziren asteburuan Ablitaseko (Nafarroa) herri kooperatiban, gabonen atarian 200 herri baino gehiagotan banatuko dituzten Nafarroa hegoaldeko produktudun Errigoraren milaka otar prestatzen. Bestelako ekimenen artean, udazken parte honetarako antolatu duten elkartasun kanpainan parte hartzen ari diren 25 ekoizleak eta haien produktuak ere bildu zituzten. Jai girorako tartea ere izan zuten ostegunean, eskualdez eskualde dabilen Errigoraren karpan.
Eskaerak bideratzeko azken egunak
Azaroaren 14ra arteko epea duzue Errigoraren otarrak eskatzeko, NOAUA!ren egoitzan. Ordainketak otarrak jasotzerakoan egin beharko dira, abenduan. Bi produktu kutxa izango dira aukeran; zuria eta beltza. Zuriak berrikuntzak dakartza, beltzak orain arteko produktuak:
-Kutxa zuria: orburuak, zainzuriak, pikillo piperrak, ardoa, ozpina, melokotoia almibarrean, pasta, arroza, pikillo piper mamia, patxaran pastak, molineritoak, tomatea olioarekin eta teilak.
-Kutxa beltza: orburuak, zainzuriak, pikillo piperrak, ardoa, ozpina, melokotoia almibarrean, potxak, aran marmelada, mahats zukua, almendrak, oliba olioa, pikillo saltsa, kardoa.
Prezioa: 50 euro.
Eskaerak: NOAUA!ren egoitzan, azaroaren 14ra arte.
Informazio gehiago eta irudiak: errigora.eus
%25a euskalgintzara
Irabazien %25a Nafarroa hegoaldeko euskalgintzara bideratuko dute. “Lodosa, Tutera eta Vianako ikastolen biziraupenerako, Erriberako AEK indartzeko eta D ereduko lerroak babesteko eta zabaltzeko dinamikak biderkatzeko”.
Baita helburu gehiago betetzeko ere: “Errigorago joateko amets berriak marrazten hasi ginen euskararentzako ere. Euskaldunak sortzeaz gain euskaraz bizitzeko espazioak irabazteko egitasmoak, euskara plazaratzeko eta jarrera baikorrak areagotzeko ekimenak eta euskaltzaleok batera aritu eta harremanak sendotzeko ohiturak abiatzeaz ari ginen. Ideia mamituz doa baina zubiak marraztu behara eskatzen du oraindik. Horretarako ere izango da aurtengo diru-ekarpena”.
Zubi berriak eraikitzen segi asmoz abiatu du ikasturte berria Errigora ekimenak, Nafarroa hegoaldeko tokiko produktuen ekoizpena eta euskalgintza sustatzen duen egitasmoak. “Ikasturte osoan zehar hartuko dugu patxada eta astia Errigoragile eta Errigorazaleon artean hausnartu eta erabakiak hartzeko. Errigorago joateko amets berri haiek errealitate bihurtzeko ze zubi behar ditugun hausnartu eta marrazteko. Hortik etorriko dira Errigora bera, elkarlan eta erantzukizun konpartituak, erronken neurri eta denborak… berrasmatu eta egokitzeak”, berri eman dute.
