Euskaraldia eta euskararen erabileran izan den beherakadak eragindako kezka hizpide nagusi hartuta batzartu ziren Potxoenean asteazken arratsalde honetan, euskalgintzako eragileak, norbanakoak eta Usurbilgo Udala. 25 bat lagun guztira.
Euskal Herri mailako Euskaraldia ekimenaren testuinguruan, eta euskararen erabileran izan den beherakada dela eta zer egin aztertzeko bildu ziren kultur etxean. Taldea osatu eta Euskaraldia Usurbilen antolatzea erabaki zuten bart.
Euskaraldia Usurbilen antolatzeko hurrengo bilkurarako hitzordua jarri zuten. Martxoaren 14an 18:00etan Potxoenean finkatu zuten saioan, Euskaraldia diseinatzeko lehen urratsak eman asmo dituzte.
Usurbilen ere Euskaraldia martxan
Hainbat herri Euskaraldira batzen hasiak dira jada. Euskararen erabilera sustatzeko ekimen desberdinak antolatzeko lanetan dabiltza, tokian tokiko euskaltzaleak. Euskaraldia bere egin, eta herri bakoitzak bere errealitate soziolinguistikora eta errealitatera moldatzen.
Deialdi honen oihartzuna Usurbila ere heldu da. Usurbilgo Udalak eta NOAUA! K.E.-k deituta gai honetan zer egin zitekeen aztertzen hasi ziren joan den hilean, euskalgintzan lanean dabiltzan udal, herri eragile desberdinetako ordezkari eta norbanakoak. Potxoenean bildu ziren guztiak; Kantu Taldea, Etumeta AEK euskaltegia, Bota Punttuba Bertso Eskola, Udarregi Ikastola, gazte mugimendua, Usurbilgo Artixten Taldea, Zumarte Musika Eskola...
Kaleko erabilera beherantz
Une ezin aproposagoan dator Euskaraldia Usurbila. Iaz argitaratu ziren, Usurbilgo Udalaren enkarguz, Soziolinguistika Klusterrak 2016ko udazkenean euskararen kale erabilera neurtzeko eginiko azterketaren emaitzak. %54koa da euskararen kaleko erabilera udalerri honetan. 2011n egin zuten aurreko neurketan %61,9koa zen. 8 puntu egin du behera honenbestez, euskararen kaleko erabilerak.
Euskaraldia
Euskara hitz egiten edo ulertzen dutenekin 11 egun euskaraz aritzea, horixe egitea proposatzen digute Euskal Herri osoan eta aldi berean, 2018ko azaroaren 23tik Euskararen Egunera, abenduaren 3ra, "Euskaraldia" ekimena sustatzen ari diren elkarte, eragile eta erakundeek. Tartean, NOAUA! kide duen Euskaltzaleen Topaguneak eta Tokikom-ek, edota Usurbilgo Udala kide duen Udalerri Euskaldunen Mankomunitateak (UEMA). Baita AEK-k, Gipuzkoako Foru Aldundiak, Eusko Jaurlaritzak, Nafarroako Gobernuak, Kontseiluak, UEU-k, Behatokiak, Irrien Lagunek, EHU-k... Eragile anitzek beraz. "Euskal Herri osoan eta elkarrekin arituta, gure egunerokoan eragin genezake", gogorarazten digute.
Euskararen erabilera sustatzea helburu nagusi duen ekimenari buruzko argibideak euskaraldia.eus atarian dituzue. 11 egunez, inguratzen gaituzten senide, lagun, lankide eta abarrekin bi roletako batean euskaraz aritzea proposatzen diete 16 urtetik gorako herritarrei. "Horretarako, herriz herri antolatuko gara, baita enpresa, ikasketa zentro eta era guztietako elkarte zein entitateka ere. Nahi duzun lekuan izena eman, eta ondoren, zure ingurukoekin parte hartu proposatzen dizugun ariketa honetan". "Ahobizi" edo "Belarriprest" izatera gonbidatzen gaituzte:
-Ahobizi: "Ulertzen duenari euskaraz egingo diot, hark erdaraz erantzun arren. Ezezagunei lehen hitza, gutxienez, euskaraz egingo diet".
-Belarriprest: "Egidazu euskaraz, nik ulertzen dut eta. Agian erdaraz erantzungo dizut, baina zuk niri euskaraz egitea nahi dut".