Ofizialki udaberrian sartzeko egun bakarra falta denean, elurra gertu ikusi dezakegu berriz hurrengo orduotan. Gauerdiaz geroztik indarrean jarria du abisu horia Eusko Jaurlaritzaren Segurtasun Sailak. 700-800 metro artean zuritu dezake goiz partean, arratsaldean 300-500 metro artean. 18:00etan hain zuzen, alerta laranja aktibatuko dute.
"Gauean elur-kota 200-300 m inguruan kokatuko da. Baliteke elur-kota noizbehinka ekaitz-eremuetan beherago kokatzea. Gauean zaparrada txiki-ertainak botako ditu, ugariagoak izango dira eta sarriago botako ditu kantauri isurialdean. Ekaitzak jo eta txingorra bota dezake. Aurreikusitako lodierak: 5-15 cm 1000 m-ra, 5-10 cm 600 m-ra, 0-5 cm 200 m-ra", horratx Euskalmet meteorologia agentziaren iragarpena.
Astearte eguerdiko 12:00ak arte indarrean segiko du alerta laranjak. Gero abisu horira itzultzeko, asteazken eguerdiko 12:00ak arte. "Elur-kota 200-300 m-ren bueltan kokatuko da, baliteke egunaren erdiko orduetan zertxobait gorago egotea. Arratsaldean eta gauean zaparrada txikiak botako ditu. Ekaitzak jo eta txingorra bota dezake. Aurreikusitako lodierak: 5-10 cm 1000 m-ra, 0-5 cm 600 m-ra, 0-1 cm 200 m-ra". Hori asteartean. Asteazkenean, "elur-kota 200-400 m inguruan egongo da, eguerdian 400-600 m-ra igoko da. Prezipitazio txikia egingo du han-hemenka, batez ere kantauri isurialdean. Aurreikusitako lodierak: 0-10 cm 1000 m-ra, 0-5 cm 600 m-ra, 0-1 cm 200 m-ra".
| Astelehena | Asteartea | Asteazkena | Osteguna | Ostirala | Larunbata |
|---|---|---|---|---|---|
EGUNOTARAKO IRAGARPENA
Martxoak 19, astelehena
"Gaur, egunak aurrera egin ahala, elur-mailak behera egingo du, arratsalde-gau partean 200 m ingurura jaitsi arte. Goizean fronte bat igaroko da eta 700-800 m-tik gora prezipitazioa elur moduan egingo du. Frontearen atzetik aire hotza iritsiko da eta horrekin batera zaparradak sartuko dira. Elur-maila 300-500 m-ra jaitsiko da arratsaldean eta 200 m ingurura gauean. Trumoi-ekaitzak ere izan daitezke tarteka, eta baliteke kazkabarra ere botatzea; ez da baztertzen ekaitz eremuetan puntualki elur-kota zertxobait gehiago jaistea. Mendebal/ipar-mendebaldeko haizea oso zakar ibiliko da zenbait momentutan".
Martxoak 20, asteartea
"Asteartean giro hotzarekin eta elur-maila baxuarekin jarraituko dugu. Elurra 200 m inguruan ikusiko dugu, baina ekaitz guneetan beherago ere zuritu dezake. Zaparrada gehien kantauri isurialdean eta mendebaldean espero dira; Nafarroa hegoaldean berriz, prezipitazioak urriagoak izango dira. Ipar-haize zakarra ibiliko da eta tenperatura maximoak 4-6 ºC artean geratuko dira".
Martxoak 21, asteazkena
"Asteazkenean prezipitazio gutxiago espero dugu baina hotzak jarraipena izango du. Zaparradak ahulagoak izango dira eta egunaren lehen partean botako ditu gehienbat; orduan elur-maila 100-300 m inguruan egongo da. Arratsalde eta gauean prezipitazioa urriagoa eta sakabanatuagoa izango da, eta 300-400 m-tik gora zurituko du. Ipar-haizea nagusituko da eta tenperaturan ez da aldaketa handirik izango".
Informazio eguneratua: euskalmet.eus