Azoka solidarioa antolatu zutenen eskertza oharra

"LH6ko ikasleen eta Udarregi Ikastolaren partez eskerrak eman nahi dizkizuegu gure Azoka Solidarioan agertutako eskuzabaltasunagatik. Gure ikasleek guztira 1.027,90€ euro lortu dituzte. Diru hau Pausoka elkartera bideratuko da. Eskerrik asko bertaratu zineten guztioi eta bereziki LH6ko ikasleei beraien lanagatik!", adierazi dute NOAUA!ra helarazi duten ohar bidez. 

Arrakastatsua suertatu zen, Udarregi Ikastolako Lehen Hezkuntzako 6. mailako ikasleek martxoaren 16an frontoian antolatu zuten azoka solidarioa. Berehala agortu ziren, ikasleok eskuragarri jarri zituzten, pultsera, pintxo eta objektu kuttunak. Gogoan izan, bildutako laguntza, behar bereziak dituzten haur eta gurasoen Pausoka Elkartera bideratuko dute.

Pausoka Elkarteko kideak ere frontoian bertan ziren, haien produktuak saltzen eta informazioa eskaintzen. Gustura haiek ere. Eta antolatzaileak baita, ikastolan gai honen inguruan egin duten lanketa plazaratuz, izan duten harrera ikusita. Lehenbizi Sutegin azalpenak eskaini zizkieten ikasleek gurasoei. Gero, aipatu moduan, postuak jarri orduko, azkar batean agortu ziren eskuragarri zeuden produktuak.

Errifa zozketa

Azoka solidarioan herriko kirolarien materiala eskuratzeko aukera eskaintzen zuen izaera bereko errifa zozketa solidarioa ere antolatu zuten. Segidan dituzue, zenbaki sarituak. "Saria jasotzeko epea martxoaren 22an amaituko da. Hortik aurrera, ordezko zenbakiak jarriko dira indarrean apirilaren 12ra arte. Saria idazkaritzan jasoko da", ohartarazi dute Udarregi Ikastolatik.