Despedida egunak ditugu honako hauek. Amaitu da ikasturtea ikastetxeetan, eta denboraldia ere amaitu dute kirol taldeek. Larunbat honetan ospakizun eguna dute hain zuzen, Usurbil F.T., Usurbil K.E. eta Pagazpe Pilota Elkarteak. Estreinakoz, hiru eragileok modu bateratuan antolatu dute kirol urte amaierako ospakizun eguna.
Kirolari gaztetxoei zuzenduriko jolasekin abiatu dute eguna. Mikel Laboa plaza, frontoia, Oiardo Kiroldegia edota Artzabal ingurua lotu duen zirkuitu modukoa prestatu diete. Uda giro beteko larunbat honetan, ondoko argazkietan ikus dezakezuenez, primeran pasa dute goiz partea. Bazkaritarako biltzekoak dira eguerdi partean, Askatasuna plazan.
