Usurbilgo Udalak sare sozialen bidez berri eman duenez, beste lau urterako berritu du Garabide Elkartearekin duen hitzarmena. Xede argi batekin; Udaletik aditzera eman dutenez, "garapen-bidean dauden herrietan hizkuntza normalizatzeko egitasmoak sustatzen jarraitzeko". Hitzarmen honen testuinguruan, 6.000 euroko laguntza emango dio Garabideri.
Garapen-bidean diren herrietako hizkuntzak normalizatze lanetan
Kooperazio era berrian lan egiten, esperientzien elkartrukean oinarritzen den lankidetza sustatzen urteak daramatza Garabide Elkarteak. Denbora darama, garapen-bidean diren herrietako hizkuntza normalizatzeko egitasmoak bultzatzen. Helburuokin:
1.- Garapen bidean dauden herrietako hizkuntza komunitate minorizatuekin lankidetza bideratzea, euskara eta euskal kulturaren garapen esperientzien trukean oinarrituta.
2.- Norabide horretan, munduko Hegoaldeko hizkuntza komunitate minorizatuetako eragileekin lankidetza proiektuak garatzea. Lankidetza proiektu horiek hizkuntzaren, kulturaren eta nortasunaren garapen-alor batzuetan gauzatzen dira, hezkuntzaren alorrean indar berezia jarriz.
3.- Euskararen eta euskal kulturaren garapenean lanean ari diren erakundeek Hegoaldeko hizkuntza komunitate minorizatuekiko lankidetzarako beren esperientzia eskain dezaten sustatzea, horretarako markoa eta bideak eskainiz.
Informazio gehiago: garabide.eus
Irudia: Usurbilgo Udala.