Herritar uholdea ikusi dugu Donostian barrena larunbat arratsalde honetan, erraustegia geratzeko manifestatzen. Eragile anitzek (Erraustegiaren Aurkako Mugimendua, GuraSOS, Gipuzkoa Zutik, GEIS/OEIT, Eguzki, Greenpeace, ERNAI, ELA, LAB, CCOO, EHNE, ESK, STEILAS, HIRU eta "No +Precariedad") deituta, milaka lagun irten da kalera Zubietako erraustegia geratzera.
Amarako Mendeurren plazatik abiatu, hiri erdiguneko kaleak zeharkatu eta Alderdi Ederren amaitu den mobilizazioan zehar, etenik gabekoak izan dira errausketaren aurkako oihuak. Baita Foru Aldundiari, aldarrikatu eta exijitzen ari zirena aintzakotzat hartu eta kasu egiteko deiak ere.
Alternatibaren alde
Manifestazio buruan, mobilizazio hau modu bateratuan deitu duten eragileetako ordezkarien hiru pankarta. Lehenengoan, manifestazioko aldarriarekin, erraustegia geratzeko exijentziarekin; atzetik, alternatiba badela gogorarazten duena, eta hirugarrenik, etorkizunari begira sustatu beharreko eredua, ekonomia zirkularraren eta birziklapen eraginkorraren bidean sakondu beharra dela gogorarazten zuena.
Hauen atzetik, aipatu moduan, herritar uholdea. Adin eta Gipuzkoako jatorri ezberdinetako milaka lagun erraustegiaren aurkako aldarriak batuta. Manifestazioa abiapuntutik helmugarantz zihoan heinean gainera, handitzen joan da, bidera batzen joan den jendetzari esker.
Denen artean, erraustegia geratzeko herri harresi galanta altxa dute Donostian.
