Arrakasta itzela izan du Euskaraldirako izen emateak. Pentsa, mila herritarrek baino gehiagok bat egin dute jada azaroaren 23tik abenduaren 3ra egingo den ekimenarekin. Azken asteotan egin dute gorantz nabarmen, Euskaraldirako atxikimenduek. Eta ostiral arratsaldean frontoian eginiko "Txipli txapa pum" ekimena horren isla argia izan zen.
Ehunka lagun hurbildu zen goiz partean Potxoenera eta NOAUA! Kultur Elkarteko egoitzara txapak jasotzera, eta arratsalde partean, frontoiko aipatu gunera. Izen eman, izen ematea egoki egin dela frogatu, Euskaraldirako zalantzak argitu eta informazioa jaso, eta azkenik, Ahobizi edo Belarriprest txapa eta eskuorria eskuratzera. Prozesu hau guztia egiteko herritarrek herritarrak izan zituzten bidelagun, bolondres sareari esker egin baitzen Euskaraldira begirako atzoko prestaketa saioa.
Txapa eta argibideak jaso ez dituzuenok adi; asteburuan, NOAUA!ren Kulturaldiaren baitan Sutegin antolatu ditugun ekitaldietan jarriko dugun mahaian eskuratu ahalko dituzue. Hau da, larunbat eta igande arratsaldean, 18:30-19:00 artean kultur etxean bertan. Euskaraldirako izena ere bertan eman ahalko duzue. Bestela, astelehenetik aurrera Potxoenean edo NOAUA! Kultur Elkarteko egoitzan. Euskaraldirako apuntatu edo Euskaraldirako txapa eta eskuorria bi guneotan jaso ahalko dituzue.
EUSKARALDIA
Azaroak 20, asteartea
18:00 Ahobizi eta Belarriprest guztientzako tailerra Potxoenean.
Azaroak 23, ostirala: Euskaraldiaren hasiera
8:00 Euskaraldiari hasiera emateko 11 suziri.
Egunean zehar, musika plaza inguruan.
17:00 Bihurri Ludotekan zinea euskaraz eta palomitak 6 urte arteko haurrentzat. Sarrera: doan.
17:30 Taloak frontoian.
Ondoren, Orbeldi dantza taldearen emanaldia eta Errebal taldearen dantza musikatua frontoian.
19:00 Andatza M.K.T.-ren Mendi Astearen baitan, “Aizkora hotsak goi mendietan” dokumentala Sutegiko auditorioan.
Izen ematea:
-NOAUA! K.E.-ren egoitzan, Potxoenean ditugun eskuorrietan.
-Emailez edo Euskaraldiak martxan jarritako web orrialdean.
-NOAUA!ren Kulturaldiko Sutegiko ekitaldietako mahaian:
Azaroak 17, larunbata: 18:30-19:00.
Azaroak 18, igandea: 18:30-19:00.
Tokia: Sutegi.
Informazio gehiago:
usurbil@euskaraldia.eus
Facebook: Euskaraldia Usurbil
Twitter: @EuskaraldiaUsur
Youtube: Euskaraldia Usurbil
11 EGUN EUSKARAZ-2018ko azaroaren 23tik abenduaren 3ra
Zer egin dezakegu euskal hiztunok euskararen erabilera areagotzeko?
Galderak hainbat erantzun ditu, baina, guk, hizkuntza ohiturak astindu eta ohiko harremanetan euskara gehiago erabiltzeko ariketa bat proposatzen dizuegu: 2018ko azaroaren 23tik abenduaren 3ra, euskaraz hitz egiten edo ulertzen dugun guztion artean egin dezagun euskaraz. Euskal Herri osoan eta elkarrekin arituta, gure egunerokoan eragin genezake.
Nola egingo dugu?
Ondoko bi roletako bat har dezagun 11 egunez:
Ahobizi: ulertzen duenari euskaraz egingo diot, hark erdaraz erantzun arren. Ezezagunei lehen hitza, gutxienez, euskaraz egingo diet.
Belarriprest: egidazu euskaraz, nik ulertzen dut eta. Agian erdaraz erantzungo dizut, baina zuk niri euskaraz egitea nahi dut.
Zer lortu nahi dugu?
-Gure harremanetan hizkuntzarekin ditugun inertziak astintzea eta uste baino gehiagotan euskarazko komunikazioa posible dela frogatzea.
-Euskal Herrian euskara ulertzen duen jendea pentsatzen duguna banio gehiago dela jabearaztea eta euskara gehiagotan erabili dezakegula ikusaraztea.
-Hizkuntza ohiturak aldatzea norberaren hautua eta ariketa izan arren, bidea taldean eta batera, erosoago eta lagunduago egitea.
-Euskara erabiltzeko testuinguru eta egoera berriak, abegikorragoak eta babestuagoak sortzea.
Non egingo dugu?
Bakoitzak bere inguruan, bere ohiko harreman sareetan egitea proposatzen dugu: familian, lagunartean, lanean, eskolan, dendetan... Horretarako, herriz herri antolatuko gara, baita enpresa, ikasketa zentro eta era guztietako elkarte zein entitateka ere. Nahi duzun lekuan izena eman, eta ondoren, zure ingurukoekin parte hartu proposatzen dizugun ariketa honetan.
Nork har dezake parte?
16 urtetik gorako herritarrek eman dezakegu izena:
-Ahobizi izateko, euskaraz hitz egiten jakin behar da.
-Belarriprest izateko euskara ulertu behar da.
Irizpideak betez gero, norberak erabakiko du zein roletan izena eman. 2018ko azaroaren 23tik abenduaren 3ra, Ahobizi edo Belarriprest ikurra soinean eraman, eta hizkuntza ohiturak aldatzeko ariketa egingo dugu!
