Joseba Tapiak bakarko ibilbideari ekin zionetik 20 urte bete dira. Urteurrena ospatzeko Vint Anys izeneko kontzertu berezia eskainiko du abenduaren 9an igandea Donostiako Victoria Eugenia Antzokian. Gaur eman ditu jaialdiaren xehetasunak.
Vint Anys egitasmo berri baten abiapuntua izango da. Joseba Tapiak talde berri bat osatu du eta birako lehen emanaldia abenduaren 9an eskainiko du Donostiako Victoria Eugenia Antzokian. Sarrerak jada salgai dira, ondoko esteka honetan: Joseba Tapia Victoria Eugenia Antzokian.
Herri musika duintzearen alde
Herri musika (edo musika popularra) berritu eta duintzeko xedez ekin dio Vint Anys egitasmoari. Nerea Erbiti, Jon Celestino, Garazi Petrirena, Asier Ituarte, Ines Sastre, Iñigo Telletxea, eta Iker Uriarte musikariak izango ditu bidelagun. Bira amaieran disko berri bat egingo dutela iragarri du Tapiak.
Leturiak ere hartuko du parte
Abenduaren 9an Donostiako Victoria Eugenia Antzokian eskainiko duen emanaldia Xabier Leturia omentzeko baliatuko du. Horretaz gain, Xabier Amuriza, Arkaitz Miner eta Niko Etxart izango dira Vint Anys kontzertuko gonbidatu bereziak.