Abenduaren 5era arte iragarria zuten arren, hilaren 31ra arte luzatu du Eusko Jaurlaritzaren Osasun Sailak, gripearen aurkako txertatze kanpaina. “Horrela, arrisku-taldeetako ahalik eta pertsona gehienei eman nahi zaie txertoa hartzeko aukera”. 299.912 pertsonek hartu dute jada txertoa. Gogoan izan, kanpaina, 65 urtetik gorako pertsonei, gaixotasun kronikoren bat dutenei, haurdun direnei eta osasun-langileei hartzea aholkatzen zaie bereziki. Txertatu aurretik, hitzordua eskatu anbulatorioan bertan edo osasun etxera deituta. Hemen telefono zenbakia: 943 361 543.
Usurbilgo Odol Emaileen Eguna abenduaren 8an
Abenduaren 8a gorriz markatua dago. Elkartasunez. Usurbilgo odol emaileek haien egun handia ospatzen dute bazkari baten bueltan. Aurten Artzabalen bilduko dira. Izen ematea zabalik egon da, telefono zenbaki hauetako batera deituta: 619 12 56 44 (Mari Jose Korta), 610 681 563 (Maite Salaberri) eta 943 36 31 02 / 688 887 537 (Agustina Arizti). Prezioa: 33 euro.
Usurbilgo Odol Emaileen Elkartetik haien jarduera ezagutarazi eta usurbildarron laguntza eskatu nahi digute, denok bizi ahal izateko ezinbestekoa dugun odola ematen hasi edo segitzeko. “Denok gara hartzaile potentzialak; izan gaitezen emaile errealak!”.
Aipatu elkartetik NOAUA!ri adierazi diotenez, “normaltzat hartzen dugu istripu, ebakuntza edo gaixotasunen baten ondorioz odola behar izanez gero, medikuek hura eskura izatea. Odol-erreserbak agorrezinak izango balira bezala! Eskubidetzat jotzen dugu, baina oraindik behintzat odola ez da laborategian ekoiztu daitekeen ondarea; denon zainetan dagoenak egiten du posible besteentzako bizi-aukera hori”, ohartarazi dute Usurbilgo Odol Emaileen Elkartetik.
Odol emateak beherantz
Kezka agertzen dute, odola beharrezkoa izan arren, odol emate kopuruak behera egin duelako azken urteotan Gipuzkoan. “Batez ere 22-34 urte arteko odol-emaile kopuruan nabaritzen da murrizketa hori. Usurbilgo datuek ere joera bera islatzen dute, eta esaterako, 2017an eta 2018an odol emaileen elkarteak esperotakoak baino 75 emaile gutxiago izan ditugu”, zehaztu dute.
Horregatik usurbildarrak odola ematera animatzen gaituzte. “Odol ematea 7-8 minututan egiten da, aurreko mediku kontsulta eta ondorengo mokadutxoa kontuan hartuta, 30 bat minutu behar dira. Gizartearekiko elkartasuna azalduz, Usurbilgo anbulategian egiten ditugun odol-emate egunetan bertaratzera gonbidatzen zaituztegu. Aurten, 143 usurbildarrek 253 emanaldi osatu dituzte. Milesker guztioi!”.
Odola emateak urtean sei konpromiso izatera lotzen gaitu. Urtarrila, martxoa, maiatza, uztaila, iraila eta azaroko lehen astelehenetan, 18:00-20:30 artean Usurbilgo anbulatoriora joatera. Gogoan izan, “18 urtetik gora izan eta osasun baldintza batzuk betez gero, edonor izan gaitezke emaile”.
Odola emateko bete beharreko baldintzak
-18-65 urte artean izatea.
-50 kilotik gora pisatzea.
-12 urte baino lehenago hepatitisa izan, kolesterol maila altua izan, baraurik egon ez edota ohiko botikaren bat hartzen baduzu ere, odola eman dezakezu.
-Emakumezkoek urtean gehienez hiru aldiz eman dezakete odola, gizonezkoek gehienez lautan. Odol emate baten eta hurrengoaren artean, gutxienez bi hilabeteko tartea igarotzen utzi beharra dago.
Informazio gehiago:
943 31 70 91