Hitz Aho Udarregi Ikastolako Guraso Elkarteak abian du larunbaterako antolatu duen Jostailu Erabilien Azokarako material bilketa. Ostegun arratsaldean Sutegin bildu zituzten jostailuak dituzue ondoko irudian. Ostiral honetan, azokarako produktu erabiliak uzteko azken eguna duzue; 17:00-19:00 artean, Sutegiko erakustaretora hurbildu beharko duzue.
Berrerabilera helburu
Etxean izan baina erabiltzen ez dugun jostailuari bestelako erabilera bat eman diezaioke beste norbaitek. Esku aldaketa hori egiten laguntzen du Hitz Aho Udarregi Ikastolako Guraso Elkarteak urtero antolatzen duen Jostailu Erabilien Azokak. Aurtengo edizioa, larunbatean, abenduaren 15ean ospatuko da, 11:00-13:00 artean frontoian.
Ekimen honetan parte hartzeko baldintza hauek bete behar dira:
-Jostailuek osorik egon behar dute. Norberari hartzea gustatuko litzaiokeen moduan.
-Bilketa egunetan jasotzen dena musu-truk emango da. Horren truke, nahi izanez gero, txartel bat jasoko du bakoitzak azoka egunean beste jostailuren batengatik aldatzeko.
-Azoka egunean jostailuak trukatzeko, 8 urtetik beherakoek, arduradun batekin parte hartu beharko dute.
-DVD eta antzekoek jatorrizkoak izan beharko dute.
-Piladun jostailuek funtzionatzen dutela erakutsi beharko da.
-Azoka amaieran bertan geratzen direnak “Ez itxi begiak” Elkarteak jasoko ditu.
Josketa tailerreko lanak ikusgai
Jostailu Erabilien Azokarako bilketa gunea dute Sutegi egunotan, Hitz Aho guraso elkartekoek. Jostailu erabilien mahaiaren alboan, guraso elkarte berak antolaturiko josketa tailerreko lanak jarri dituzte ikusgai. “9 ikaslek hartu zuten parte bertan eta lan politak egin zituzten Kattalin eta Arantxaren laguntzarekin”.
