Gogoan izan, Usurbildik 600 kilometrora segitzen dute preso Olatzek, Patxik eta Xuak, nahiz aspaldi kalean, Usurbilen behar zuten hirurek, Lasagabasterrek eta Urangak espetxe zigorraren hiru laurdenak beteak baitituzte jada. Ekainean 10 urte beteko dituzte espetxeratu zituztenetik. Egun, 2021eko ekainerako finkatua dute irteera data.
Aipatu moduan halere, egun indarrean den araudia aplikatuta kalean behar lukete. Euskal presoen eskubideen alde Mikel Laboa plazan egin berri duten hileroko azken ostiraletako elkarretaratzean gogorarazi dutenez, beste hainbat presoren kasuan bezala, "Olatz eta Patxiren kasuan ere lege arrunta aplikatzea eskatzen dugu eta eskubidez dagokien baldintzapeko askatasunean jartzea".
Horrekin batera, Olatz eta Patxiren haur Xuak hiru urte beteko ditu datorren 2020ko urtarrilean eta honenbestez, gurasoengandik urrunduko dute espetxetik irten beharko baitu. Hala gerta ez dadin exijitzeko, "Xuak hiru urte beteko dituenean bere gurasoengandik banatu ez dezaten exijitzeko", datorren ekainaren 22an "Xua Gurasoekin Etxera" herri ekimena aurkeztuko dute Usurbilen.
Xua Gurasoekin Etxera
"Xua Gurasoekin Etxera" ekimena aurkeztuko dute ekainaren 22an
Hala iragarri berri du Usurbilen Nahi Ditugu bilguneak deituta, euskal presoen eskubideen alde ostiral arratsalde honetan Mikel Laboa plazan egin duten elkarretaratzean. Helburu argi bat izango du herri ekimen berriak; Valentziako Picassenteko espetxean diren Olatz Lasagabaster eta Patxi Uranga presoen alaba "Xuak hiru urte beteko dituenean, bere gurasoengandik banatu ez dezaten exijitzeko" lan egitea.