"Xua Gurasoekin Etxera" herri ekimenaren aldeko postua jarri dute estreinakoz

Ekainaren 22an jendaurrean aurkeztuko duten herri ekimeneko arropa saltzen aritu dira Ikastola Egun honetan Sutegi atarian. Postua hurrengo asteotan jarriko dute berriz. Gogoan izan, Usurbildik 600 kilometrora dagoen Picassenteko espetxean da Xua, bere guraso Olatz Lasagabaster eta Patxi Urangarekin. Urtarrilean 3 urte beteko ditu eta espetxetik irten beharko du, gurasoak bertan utzita. Herri ekimen berriak, Xua gurasoengandik ez banatzea eta hiruren etxeratzearen alde lan egingo du.

Hala iragarri zuen Usurbilen Nahi Ditugu bilguneak deituta, euskal presoen eskubideen alde maiatzaren 31n Mikel Laboa plazan egin zuten elkarretaratzean. Helburu argi bat izango du herri ekimen berriak; Valentziako Picassenteko espetxean diren Olatz Lasagabaster eta Patxi Uranga presoen alaba "Xuak hiru urte beteko dituenean, bere gurasoengandik banatu ez dezaten exijitzeko" lan egitea.

Gogoan izan, Usurbildik 600 kilometrora segitzen dute preso Olatzek, Patxik eta Xuak, nahiz aspaldi kalean, Usurbilen behar zuten hirurek, Lasagabasterrek eta Urangak espetxe zigorraren hiru laurdenak beteak baitituzte jada. Ekainean 10 urte beteko dituzte espetxeratu zituztenetik. Egun, 2021eko ekainerako finkatua dute irteera data. 

Aipatu moduan halere, egun indarrean den araudia aplikatuta kalean behar lukete. Euskal presoen eskubideen alde Mikel Laboa plazan egin berri duten hileroko azken ostiraletako elkarretaratzean gogorarazi zutenez, beste hainbat presoren kasuan bezala, "Olatz eta Patxiren kasuan ere lege arrunta aplikatzea eskatzen dugu eta eskubidez dagokien baldintzapeko askatasunean jartzea". 

Horrekin batera, Olatz eta Patxiren haur Xuak hiru urte beteko ditu datorren 2020ko urtarrilean eta honenbestez, gurasoengandik urrunduko dute espetxetik irten beharko baitu. Hala gerta ez dadin exijitzeko, "Xuak hiru urte beteko dituenean bere gurasoengandik banatu ez dezaten exijitzeko", datorren ekainaren 22an "Xua Gurasoekin Etxera" herri ekimena aurkeztuko dute Usurbilen. Aldaketarik ez bada, 12:00etan Askatasuna plazako parkean.