[Kulturaldia] Ugaitz Agirreren poesia errezitaldia 19:30etan Sutegin: “Ez da errezitatze saio huts bat izango”

NOAUA! Poesia errezitaldia eskainiko duzu Sutegin. Zure poema propioak edo besteenak errezitatuko dituzu?
Ugaitz Agirre: "Non dago Amaia?" poesia performantzea dela esan daiteke, parte naizen gizartea ardatz hartuta idatzitako poema propioekin osatutakoa. Emanaldiaren eskema nagusia ipuin batek osatzen du, beraz hiru kapitulu nagusi daude: hasiera, korapiloa eta amaiera. Horien arabera sailkatu ditut poemak. Lehen zatian liluramendutik esnatzearen inguruko poemak entzungo dira, hain zuzen, “Haur ipuin bat” eta “Grabitatea”. Bigarrengoan, gizarteko arazo ezberdinak tratatzen dira eta bertan entzungo dira bestelako ekitaldietan errezitatuak ditudan “Progresua”, “Kaioak” edota “Denbora”. Hirugarren zatian, bukaera legez, arazoen irtenbidea iradokitzen saiatu naiz. Orotara hamasei poema errezitatuko ditut. Hala ere, eta hasieran esan dut, ez da errezitatze hutsa izango. Eszenaratze bat dago eta musika, antzerkia eta irudiak ere egongo dira hitzarekin batera. Olerkiak musikaren gainean errezitatuko ditut eta abestien hautaketa egiterakoan marrazki bizidunetako musikara mugatu naiz. Marrazki bizidunak haurrekin lotzen ditugu orokorrean, eta horrekin jolastu nahi dut errezitaldian zehar: nola haur ipuin bat helduen amesgaizto bihurtzen den. Bestetik, irudiak proiektatuko dira diskurtsoaren lagungarri izan daitezen, beti ere haur ukitu horrekin. Eta azkenik, mozorrotuta agertuko naiz oholtzan antzerkiari berari laguntzeko.