Mota guztietako entitateek har dezakete parte: erakunde publikoek, gizarte eragileek, enpresek, kooperatibek, kultur eta kirol taldeek, etab.; tokian tokikoek, eskualde mailakoek, lurralde batekoek zein Euskal Herri osokoek.
Parte hartu nahi duten entitateek edo informazio gehiago eskuratu nahi dutenek Usurbilgo Euskaraldia batzordearekin jarri behar dute harremanetan usurbil@euskaraldia.eus helbidean edo 943 37 19 99 zenbakira deituz.
Lehen edizioan egin moduan, belarriprestei eta ahobiziei proposatuko die, 15 egunetan, euren egunerokoan egin dezaten ariketa; baina horrez gain, euskaraz mintzatzeko gai diren hiztun-taldeak identifikatu beharko dituzte entitateek: ARIGUNEAK. Horrela, taldean ere hizkuntza-ohiturak euskararen mesedetan aldatzeko ariketa egin ahal izango dute.
Aurkezle-sarea osatzen
Aurkezle-sarea osatzen ari da Euskaraldia batzordea, entitateei Euskaraldiko funtzionamendua azaltzeko. Norberak erabakiko du zein entitateri aurkeztu nahi dion: lan egiten duen enpresari, irakasle edo guraso diren ikastetxeari, bazkide diren elkarteari, kafea hartzen duten tabernari, erosketak egiten dituzten dendari, afiliatua dauden sindikatu edo alderdi politikoari…
Aurkezle-sarean izena ematen dutenek laguntza eta materiala jasoko dituzte aurkezpenak egiteko, eta beharrezkoa izanez gero, formazioa ere bai. Izena emateko usurbil@euskaraldia.eus helbidera mezua bidali edo 943 37 19 99 zenbakira deitu beharko da.