Euskaraldia

Luis Jambrina: "Nire egunotako erronka, euskaraz mintzatzea otorduetan"

"Etxealditik Euskaraldira" igarotzeko ekimen zikloko hirugarren eguna. Gaurkoan, igandea izanik, euskara bazkaritara, gure mahaietara ekartzeko gonbita luzatu digute. Usurbilen ere herritarrak euren ekarpenak egiten hasiak dira. Hemen Luis Jambrinaren gonbita. 

"Etxealditik Euskaraldira ekimenaren barruan, euskaltegian nagoenez, nire erronka izango da, nire familiaren laguntzaz, datozen egun hauetan euskaraz mintzatzea otorduetan. Erronka txikia izango da eta espero dut ohitura hori zabaltzea hemendik aurrera. Aupa Euskaraldia!", adierazi du Luis Jambrinak Euskaraldia Usurbilek hedatu duen bideoan.

Proposamen bat egunero
Ostiral honetan Euskal Herri osora hedatu den ekimenarekin bat egin du Usurbilek ere. Bi helburu bete nahi dira; "etxekoekin eta etxetik ditugun hizkuntza-ohituren gainean pentsaraztea; eta euskararen erabilera sustatzea, horretarako bitartekoak eskainiz". Azaroaren 20tik abenduaren 4ra ospatuko den 2. Euskaraldirako entrenamendu gisa planteatzen dute ariketa hau. 

Guztia prest izateko taula bat osatzea proposatzen digute, egunotan ditugun harremanekin, eta harremanotan baliatzen dugun hizkuntza adieraziz. Gure hizkuntza ohiturak egunez egun eta norekin ditugun zehaztuko duen taula bat osatzea alegia. Diagnosi moduko bat marraztuko dugu hartara. Etxeko balkoi eta leihoetan puntu koloretsu bat jartzera animatzen gaituzte, "Etxealditik Euskaraldira" ekimenean parte hartzera goazela adierazteko. Eta adi, apirilaren 24tik 30era, egunero bideo bidez, ditugun hizkuntza ohiturak finkatzen edo aldatzen eragiteko proposamenak jasoko ditugu.


"Etxealditik Euskaraldira"
Iraupena: apirilak 24-apirilak 30.
Egutegia:
-Apirilak 24-30: hizkuntza-ohiturak aldatzeko ariketak. Egunerokotasunean oinarrituriko zazpi ideia-proposamen, egunero bat.
Informazio gehiagorako:
usurbil.euskaraldia.eus
Facebook: Euskaraldia Usurbil
Twitter: @EuskaraldiaUsur
Instagram: @euskaraldiausurbil