Euskaraldia

5. erronka: "Erosketak egitean ere, lehen hitza euskaraz egingo dugu?"

Noaua Aldizkaria 2020ko api. 28a, 08:58

"Etxealditik Euskaraldira" ekimen zikloaren bosgarren eguna gaur. Astearte honetan, erosketak egiterakoan lehen hitza euskaraz egitera animatzen gaituzte.

Jolasean, bazkaltzerakoan, online bidezko poteoan edota sare sozialetan bezala, egunotan ezinbestekoak ditugun erosketak egiterakoan euskara ahotan hartzera animatzen gaitu "Etxealditik Euskaraldira" ekimen zikloak. Hortxe beraz, astearte honetarako (apirilak 28) proposatzen diguten bosgarren erronka; "Erosketak egitean ere, lehen hitza euskaraz egingo dugu?".

Josu Pedruzo, Euskaraldia Gasteiz
"Egoera zail honetan, konplikatua den arren, lehen hitza euskaraz egitea garrantzitsua da, interakzioa edo elkarrizketa aldatu daitekeelako. Saiatuko gara?".

Proposamen bat egunero
Euskal Herri osora hedatu den ekimenarekin bat egin du Usurbilek ere. Bi helburu bete nahi dira; "etxekoekin eta etxetik ditugun hizkuntza-ohituren gainean pentsaraztea; eta euskararen erabilera sustatzea, horretarako bitartekoak eskainiz". Azaroaren 20tik abenduaren 4ra ospatuko den 2. Euskaraldirako entrenamendu gisa planteatzen dute ariketa hau. 

Guztia prest izateko taula bat osatzea proposatzen digute, egunotan ditugun harremanekin, eta harremanotan baliatzen dugun hizkuntza adieraziz. Gure hizkuntza ohiturak egunez egun eta norekin ditugun zehaztuko duen taula bat osatzea alegia. Diagnosi moduko bat marraztuko dugu hartara. Etxeko balkoi eta leihoetan puntu koloretsu bat jartzera animatzen gaituzte, "Etxealditik Euskaraldira" ekimenean parte hartzera goazela adierazteko. Eta adi, apirilaren 24tik 30era, egunero bideo bidez, ditugun hizkuntza ohiturak finkatzen edo aldatzen eragiteko proposamenak jasoko ditugu.


"Etxealditik Euskaraldira"
Iraupena: apirilak 24-apirilak 30.
Egutegia:
-Apirilak 24-30: hizkuntza-ohiturak aldatzeko ariketak. Egunerokotasunean oinarrituriko zazpi ideia-proposamen, egunero bat.
Informazio gehiagorako:
usurbil.euskaraldia.eus
Facebook: Euskaraldia Usurbil
Twitter: @EuskaraldiaUsur
Instagram: @euskaraldiausurbil