Herritarrak entretenitzeko. Susana Martinek arrazoi horregatik zabaldu zuen Zirriborro Eskulan Tailerraren kanala Youtuben. Etxean dituen gauzekin eskulan bat egiten du egunero eta sare sozial ezberdinetan partekatzen du gero, tartean, Usurbilgo Artixten txokoan. “Nire senarrak laguntzen dit”, aitortu digu Susanak. “Berak grabatzen ditu bideoak eta extra moduan askotan gure katua agertzen da planoan”.
Eskaintza oparoa
Semea eta senarra gaixotu egin ziren eta koarentena ezarri zieten. “Orduan okurritu zitzaidan kanala irekitzea”. Youtuben Zirriborro Eskulan Tailerra idazten baduzue, bertan agertuko zaizkizue Susana Martinek aste hauetan zehar igo dituen bideo guztiak. Eguzkilorea, txoriek jateko ontzia, postala, dantzaria... Oparoa da eskulanen eskaintza. 30 bat bideo igo ditu orain arte. Tartean, albiste honetara lotu dugun hauxe: Eguzkilorea.
Herritarrei irekia
Argazkietan ageri diren eskulan batzuk Susana Martinenak dira, besteak ikasleenak dira. Tailerreko kide izan gabe, herriko jendeak ere parte hartzen du ekimen honetan. “Batzuk eskulanak donatu egin dituzte, saldu ahal izateko”. Susana Martinek adierazi digunez, “dirua Ugandara bidaliko da Maddi Egizabalen bitartez”.