Koronabirusa

Eusko Jaurlaritzaren arabera, osasun-zaintzako fasean sartu gara

Espainiako Gobernuak estatu osorako alarma egoera beste hilabetez luzatu nahian dabilen honetan, Eusko Jaurlaritzak uztailaren 12ko hauteskundeak ofizialki deitu dituen astearte honetan, osasun-larrialdiko fasea gainditutzat jo eta "osasun-zaintzako" fasean sartu garela dio Osasun Sailak.

Eusko Jaurlaritzaren Osasun Sailak iragarri duenez, martxoaren 13an, itxialdia hasi bezperan indarrean jarri zen Euskadiko Herri Babeserako Plana, Larrrialdiei Aurregiteko Bidetik, "osasun-zaintzako fasera" igaro gara. Nekane Murga osasun sailburuak hartutako erabakiari buruzko xehetasunak astearte honetako (maiatzak 18) Euskal Herriko Agintaritzaren Aldizkariak dakartza.

Osasun sailburuak beraz honakoa ebatzi du; "Lehendakariari eskatzea Euskadiko Euskadiko Herri Babeseko Plana, Larrialdiei Aurregiteko Bidea (LABI), modulatzeko, orain hasiko den osasun-zaintzako fasera egokitzeko. LABI plana Segurtasuneko sailburuaren 2020ko martxoaren 13ko Aginduaren bidez aktibatu zen, COVID-19aren hedapenak eragindako alerta epidemiologikoari aurre egiteko".

Osasun-larrialdiko fasea gainditutzat jo dute
Aldaketa hau emateko zergatia azaldu du Osasun Sailak. "Pandemia bi hilabetez kudeatu ondoren, haren bilakaeraren egungo adierazleek diote egun geldiarazte- eta gutxitze-fasean gaudela (esaterako, oinarrizko birsorkuntza-zenbakia (R0) 1,75 zen zuzendaritza-batzordea sortu zen egunean, eta 0,77 ingurura jaitsi da 2020ko maiatzaren 11n). Horren azken helburua da, lehenik, kurba epidemiologikoak berriro goranzko joerarik ez izatea, eta, bigarrenik, izaera finalistarekin, normaltasun-egoera batera itzultzea, askatasun indibidual eta kolektiboari gutxiago eragingo dioten prebentzio-neurriekin".

Horrekin batera, egun "normaltasun berrirako" trantsizio prozesu horretan, lehen fasean gara. "Osasun-larrialdiko fasea gainditutzat jotzen da, zeinaren helburu nagusia osasun-sistema ez kolapsatzea baitzen. Orain, osasun-zaintzako fase bati ekin behar zaio, eta fase horren helburua da epidemia geldiaraztea eta gutxitzea, kasuak eta kontaktuak kudeatuz".