Covid19a gure artera heldu aurreko 2020ko lehen hilabeteetan Sutegi udal liburutegiak eta Usurbilgo Udaleko Parekidetasun Sailak euskarazko bi irakurketa-solasaldi antolatu zituzten; bietan bi eleberri aztertu zituzten ikuspegi feministatik, Kattalin Miner kazetari eta idazlearekin. Urtarrileko saioan Eider Rodriguezen "Bihotz handiegia"; martxoaren 8aren testuinguruan Uxue Alberdiren "Jenisjoplin".
Konfinamendua tarteko itxita egon da geroztik Sutegi udal liburutegiaren egoitza. Ekainaren 1ean, maileguen sistema berreskuratu zuten kultur etxeko sarreran jarritako mahaiarekin. "Deseskalatze" prozesu betean gauden honetan, urrats berri bat emango dute orain; liburutegi barruko bizitza berriz pizten hastera doaz, ekainaren 23rako antolatu duten hitzorduarekin.
"Pertsona transexualek gainditu beharreko oztopo ikusgarri zein ikusezinak marrazten dira"
Aipatu moduan, ekainaren 23an helduko diete berriz irakurketa-solasaldiei. Urte hasieran egin bezala, Kattalin Miner gonbidatu dute arratsaldeko 18:00etan hasiko den ekitaldira. Oraingoan, Minerren beraren sortze lan bat izango dute mintzagai; "Moio: gordetzea ezinezkoa zen" izenekoa.
Liburua Kattalinek lagun min Aimar Elosegi Ansaren bizitza eta heriotza erretratatzen du. "Suizidioa eta transexualitatea, gure gizartea durduzatzen duten bi tabu elkartu ziren heriotza horretan. Bere garaian zirraraz eta hunkiduraz beteriko erantzuna izan zen Hernaniko herrian, lagunarenganako maitasunaz gainera transexualitatearekiko enpatia eta jarrera berri baten beharra aldarrikatu zituena. Urteak igaro ahala, ordea, zer geratu da? Ez ote da maila intimora igaro dimentsio publiko eta politikoa erdietsi zituen kasua? Hipotesi horretatik abiatuta, hainbat elkarrizketa egin ditu Minerrek".
Liburuan bildu dituen lekukotzekin, "pertsona transexualek gainditu beharreko oztopo ikusgarri zein ikusezinak marrazten dira, gure gizartearen transfobia aitortu zein aitortu gabeak, azken batean. Erreportaje bizi, zintzo eta sakona eskaintzen zaigu, hortaz, guztioi zer pentsatua eman beharko ligukeena".
Segurtasun berme guztiekin ospatuko da ekitaldia. Horregatik, "aforoa mugatua denez, aldez aurretik izena eman behar da", ohartarazi dute Sutegi udal liburutegitik. Liburua bera eLiburutegian (Liburutegi digitalean) eskuratu ahal izango da. "Digitalki lortzeko laguntza behar baduzu, jarri gurekin harremanetan"; baita noski ekitaldira joan nahi dutenek ere. Bideotatik eman daiteke izena:
Tfnoa: 943360692
Whatsapp: 688625477
Sutegi udal liburutegia
-Momentuz itzulketa mailegu zerbitzua soilik. Liburuak kanpoko buzoira itzuli, 14 egun pasako dituzte berrogeialdian.
-Liburuak hartzeko ordutegia: 10:00-18:30. Bideotatik: 943 36 06 92 / 688 625 477 (Whatsapp) / biblioteka@usurbil.eus
-Liburuen kontsulta, online katalogoan: katalogoak.euskadi.eus / liburubila.euskadi.eus
-Eraikinaren atarian jarriko dituzte mahaiak, mostradore gisa.
-Aldez aurretik dokumentu eskaera egin eta hitzordua eskatu. Ordutegia: astelehenetik ostiralera, 10:00-18:30.
-Katalogoa kontsultatzeko:
katalogoak.euskadi.eus
liburubila.euskadi.eus
Hartuemanetarako:
943 360 692
688 625 477 (Whatsapp)
biblioteka@usurbil.eus
Euskadiko Liburutegien Sarearen gomendioak
1-Posible bada, liburuak aldez aurretik eskatu.
2-Hobe bakarrik bazatoz eta liburua gordetzeko poltsa ekarri, mesedez.
3-Adin txikikoak eta menpekoak bakarrik etor daitezke beste pertsona batekin batera.
4-Eskuak garbitu eta maskara ekarri.
5-Lurrean markatutako ibilbideak edo liburuzainen argibideak jarraitu.
6-Tarte soziala errespetatu.
Konfinamenduaren osteko jendaurreko lehen ekitaldia iragarri du Sutegi udal liburutegiak ekainaren 23rako; euskarazko irakurketa-solasaldia Kattalin Miner idazle eta kazetariarekin. Bere "Moio: gordetzea ezinezkoa zen" izeneko sortze lana aurkeztuko du. Bizi dugun egoera kontuan izanda, ekitaldira joateko aurrez izena eman beharko da. Liburua eLiburutegian eskura daiteke aurrez.