Euskaraldia

Txapak NOAUA! K.E.-n eta Sutegin jasotzeko aukera gaur

Abiatzear den Euskaraldirako izen emateak zabalik segiko du ostegunera arte. Txapak jasotzeko aukera ere izango da egunotan; ekimena Usurbilen sustatzen ari den herri batzordeak horretarako mahaia jarriko du gune desberdinetan. Asteazken honetan NOAUA! K.E.-ren egoitzan edota Sutegi ondoan.

48 ordu baino ez, azaroaren 20tik abenduaren 4ra ospatuko den 2. Euskaraldia abiatzeko! Euskara ahotan gehiago, gehiagorekin eta gehiagotan hartzea sustatu nahi duen ariketa kolektiborako izen emateko ostegunera arteko tartea izango duzue. Txapak jasotzeko azken egunak dira honako hauek. Euskaraldia Usurbilen sustatzen ari den herri batzordeak banaketarako mahaia kaleratuko du berriz astearte honetatik aurrera. Plazaratu duten kartelean duzue hitzorduen berri.

Azaroak 18, asteazkena
10:00-14:00 NOAUA! K.E.-ren egoitza.
18:30-19:30 Sutegi ondoa.

Azaroak 19, osteguna
10:00-14:00 Potxoenea.
18:30-19:30 
Sutegi ondoa.

Azaroak 20, ostirala
10:00-14:00 NOAUA! Kultur Elkartea.
18:00-19:00 Sutegi ondoa.

Informazio gehiago jaso eta izen ematea online bideratzeko:
izenematea.euskaraldia.eus
usurbil.euskaraldia.eus

Bi “rol” aukeran
-Belarriprest: 
“Lekua, gaia edo egoeraren arabera erabakitzen dut euskaraz noiz eta norekin egin. Agian, ez dut beti euskaraz egingo ulertzen duten guztiekin, baina euskara dakitenek niri uneoro euskaraz hitz egitea nahi dut; eta horixe eskatzen diet modu esplizituan”.

-Ahobizi: “Euskaraz ulertzen duten guztiekin euskaraz egiten dut uneoro. Kideek euskaraz ulertzen ote duten ez dakidanean lehen hitzak, beti, euskaraz egiten ditut; euskaraz ulertzen badute, euskaraz jarraitzen dut. Batzuetan zaila den arren, elkarrizketa elebidunetan ere euskarari eusten diot kideek ulertzen dutenean”.

Banderolak salgai
Euskara ahotan gehiago, gehiagorekin eta gehiagotan hartzeko aukera eskaini nahi du azaroaren 20tik abenduaren 4ra iragarri den 2. Euskaraldiak. Prestatzen hasteko garaia da jada. Batetik, balkoietan jartzeko banderatxoak plazaratu dituzte. Usurbilgo Eroski Cityn eta Laurok liburudendan topatuko dituzu, 5 eurotan salgai. Eta bestela, Euskaraldiaren web orrialdeko dendan, Elkar dendetan edota Berria egunkaria saltzen duten kioskoetan.

Euskaraldiko banderatxoa zure etxeko balkoian jartzen baduzu, Euskaraldiko produktu-loteen zozketan parte hartzeko aukera izango duzu. Hauek dituzu lehiaketako arauak:

  • Atera argazkia Euskaraldiko zure banderatxoarekin.
  • Igo zure Facebook, Instagram edo Twitter kontura.
  • Ez ahaztu etiketatzea #JantziKaleak
  • Listo. Zorte on Euskaraldiko produktu loteen zozketan.