Euskaraldia

Hitzordu gehiago, Euskaraldiko bigarren eta azken aste honetarako

Noaua Aldizkaria 2020ko aza. 30a, 10:57

Lau egun barru, abenduaren 4an amaituko da Euskaraldia. Ordura arte zenbait hitzordu deitu ditu ekimena Usurbilen sustatzen ari den herritarren batzordeak; Mikel Laboa oroitzeko ekimenak, euskararen erabilera erdigunean jarriko duen bertso saioa Sustrai Colina eta Jone Uriarekin, edota Onintza Enbeitaren "Non gelditu gara gu?", euskalgintza, feminismoa eta pandemia ahotan hartuko dituen hitzaldia. Azken bi ekitaldiotarako izena aurrez bideratu beharko da usurbilkultura.eus atarian.

EUSKARALDIA USURBILEN
Abenduak 1, asteartea: "Mikel Laboa gogoan"
Egun osoan: 12 urte dira Mikel Laboa zendu zela. Usurbilen hainbeste maite genuen Mikel gogoan izango dugu, egunean zehar bere musika entzunez. Bestalde, azaroaren 30etik abenduaren 6ra bitartean, Mikeli idazteko Erregistro Liburua herritarren eskura egongo da Sutegi liburutegian.


Abenduak 3, osteguna: Euskararen Eguna
19:00 "... nahi dugu hitz eta jolas" bertso saioa Sutegiko auditorioan.
Zehaztasunak: Sustrai Colina eta Jone Uria bertsolariak euskararen erabilerari buruz jolasean jarriko ditu Imanol Artola "Felix" gai-jartzaileak, hizkuntzarekin eta hizkuntzatik. Euren bizipenak bertso-saio tematikoan kantatuko dituzte: seriotik, umoretik, sakonetik, azaletik...
Sarrera: izena eman abenduaren 1a baino lehen usurbilkultura.eus atarian.
Edukiera: 78 lagunentzako lekua.

 
Abenduak 4, ostirala: 
18:00 Onintza Enbeitaren "Non gelditu gara gu?" hitzaldia Sutegiko auditorioan. 
Zehaztasunak: "Euskalgintza, feminismoa eta pandemia aztergai: “Mundua bere buruari begira gelditu den honetan, gure borroka txikiek zail daukate euren burua erakusten. Helmuga betikoa da orain ere: Euskal Herria euskalduna eta feminista. Zein izango dira ordea estrategia berriak? Egoeraren irakurketa kolektiboarekin hastea onena".
Sarrera: abenduaren 2a baino lehen usurbilkultura.eus atarian. 

Edukiera: 78 lagunentzako lekua.

Antolatzailea: Euskaraldia Usurbil.