Norma Vazquez Garcia eta Sheila Melcon Lopez ariko dira hizlari lanetan, euskaraz eta gaztelaniaz bideratuko den hitzorduan. Biak ala biak indarkeria matxistaren aurka eta emakumeen ahalduntzea sustatzearen alde lanean diharduen Bilboko Sortzen aholkularitza zerbitzuan lan egiten dute. Emakumeen aurkako indarkeria matxistari lotutako politika publikoak hobetu eta ikusgarri egiten laguntzeko erakunde eta eragile sozial anitzekin lan egiten dute.
Norma Vázquez García, psikologo feminista da. 40 arte darama talde feminista ezberdinetan parte hartzen. Emakumeen aurkako indarkeria matxistaz ikertzen aritu da urteotan, eta hainbat entitateei aholkularitza eta formazio zerbitzuak eskaini dizkie.
Sheila Melcon Lopez psikologoa eta gizarte hezitzailea da. Baztertze arriskuan diren kolektiboekin proiektu sozialetan lan egiten urteetako esperientzia du. Berdintasunari, indarkeria matxistari lotutako hainbat formazio tailer ere eskaini izan ditu.
Sortzen-eko bi kideok arituko dira hilaren 17an hizlari gisa Sutegin.
Erakunde adierazpena
Emakumeen Aurkako Indarkeria Ezabatzeko Egunaren (azaroak 25) biharamunean, erakunde adierazpena onartu zuten hilaren 26an aho batez udalbatzak eginiko osoko bilkuran.
Aurten noski, pandemiaren eragina ere islatzen du adierazpen honek. "Krisi-testuinguru guztiak, pandemia honekin gertatzen den bezala, indarkeria matxista, ugaltzeko, biderkatzeko eta ugaritzeko haztegi bat dira", ohartarazten du. Horregatik, testuinguru honetan "bizirik irauteagatik indarkeriari aurre egiten ari diren emakume eta neskengan" arreta jartzea ezinbestekotzat jotzen du adierazpenak.
Urte honetan gaur arte Euskal Herrian erahildako lau emakumeak oroitzen ditu adierazpenak. Errealitate latz honen aurrean, konpromiso politiko argia eskatzen du erakunde adierazpenak emakumeen aurkako indarkeria matxista lehentasun politiko bilakatzeko. Erakunde adierazpen honekin Udalak zenbait konpromiso hartzen ditu. Besteak beste: indarkeria matxista pairatzen duten emakumeak arreta-prozesu osoaren erdigunean kokatzea; behaketa hobetzea; emakumeoi zuzenduriko arreta- eta laguntza-zerbitzuak egokitzea; emakumeen ahalduntzea eta gazteen artean prebentzioa sustatzeko programak bultzatzea; covid19-aren eragina aztertzea eta eragin hau arintzeko genero-ikuspegia txertatzea; erakundeen arteko lankidetza eta koordinazioa bultzatzea...
______________________________________________________________________________________________
Azaroaren 25eko erakunde adierazpena, Emakumeen Aurkako Indarkeria Ezabatzeko Eguna dela eta
Covid19-aren pandemiak gure bizitza eta komunitateak kolokan jarri ditu, pertsona guztien osasunari, segurtasunari, ongizateari eta komunitate-bizitzari erronka handia jarriz. Mundua ulertzeko eta bertan egoteko dugun modua aldatzen ari da. Konfinamenduak, mugimendu-murrizketek eta harreman-mugek agerian utzi dituzte, beren gordintasun osoz, indarkeria matxista mota desberdinei aurre egiten ari diren emakumeen egoera oso ahulak.
Krisi-testuinguru guztiak, pandemia honekin gertatzen den bezala, indarkeria matxista, ugaltzeko, biderkatzeko eta ugaritzeko haztegi bat dira. Indarkeria hori botere-harreman desorekatuen eta emakumeen aurkako diskriminazioaren adierazpen bat da, eta pairatzen ari garen krisi sanitario, sozial eta ekonomikoaren ondorioz larriagotu egiten dira.
Pandemiak sortutako egoeran, arreta jarri behar dugu beren etxeetan, lanetan eta bizi-espazioetan bizirik irauteagatik indarkeriari aurre egiten ari diren emakume eta neskengan. Gizartearen aitorpen eta elkartasun osoa merezi dute. Testuinguru horretan, isolamendua, babesgabetasuna eta ikusezintasuna saihesteko baldintza egokiak sortzeko lanean jarraitu behar dugu. Horregatik, aurten Euskal Herrian hildako lau emakumeak gogoratu nahi ditugu bereziki gaur, bi EAEn eta beste bi Iparraldean. Errealitate mingarri horrek gizarte gisa interpelatu egiten gaitu, lanean jarraitzeko eta mobilizatzeko konpromisoa hartzeko, horrela gerta ez dadin.
Hala ere, horrekin ez da nahikoa. Konpromiso politiko argia behar dugu, gizarteak erakundeei eskatzen baitie emakumeen aurkako indarkeria matxista lehentasun politiko bihur dezatela. Inoiz ez bezala zerbitzu publikoen eta erakundeen laguntza eta baliabide guztiak izateko, emakumeei beren askapen-, berreskuratze-, ahalduntze- eta autonomia-prozesuetan laguntzeko garaia da. Ezinbestekoa da emakumeek duintasunez eta segurtasunez bizitzea merezi duen bizitzarako oinarrizko eskubidea berreskura dezaten. Behar-beharrezko baldintza da, gainera, gure herriak eta hiriak bizikidetza seguru, solidario eta berdinzalerako gune gisa indartu daitezen.
Herritarrengandik hurbil gaudenez, euskal udalok ahotsa jarri nahi diogu gure udalerriek emakumeekiko eta indarkeria matxistaren beste biktima batzuekiko duten elkartasunari. Gure erantzukizuna gure gain hartzen dugu, erakunde, kolektibo feminista eta emakumeen kolektibo, aditu eta gizarteko eragile guztiekin lankidetzan eta koordinatuta. Horregatik guztiagatik, Usurbilgo Udalak konpromiso hau hartzen du:
-Indarkeria matxistaren biktima diren emakumeen eskubideak arreta-prozesu osoaren erdigunean jartzea, haien beharrak eta eskaerak entzun eta aintzat hartuta, babeserako, arretarako, erreparaziorako eta berriz ez gertatzeko bermerako eskubidea bermatuko duten politika berriak diseinatzeko.
-Behaketa hobetzea, indarkeria-egoeretan dauden emakumeen forma eta profil berriak hautemateko eta horien aurrean azkar jarduteko.
-Indarkeria matxistaren edozein formari aurre egiten dioten emakumeentzako arreta- eta laguntza-zerbitzuak mantentzea, hobetzea eta egokitzea, ikuspegi konpontzailearekin, erakunde bakoitzaren eskumenen esparruan.
-Emakumeen ahalduntzeari eta gazteen artean indarkeriaren prebentzioari laguntzeko programak bultzatzea, etorkizuneko indarkeria-egoerak eragozteko funtsezko tresnak diren aldetik.
-Tokiko bizitzan berdintasun-programak zaintzea eta egonkortzea, emakume-kolektibo batzuen egoera ahulak areagotzeko desberdintasunak areagotzearen aurka borrokatzeko.
-Covid19aren krisiak emakumeen pobretzean eta kalteberatasunean duen eragina aztertzea, laguntza-jarduera espezifikoak diseinatu ahal izateko.
-Genero-ikuspegia txertatzea enplegu-galerak, diru-sarrerak eta krisiaren beste eragin negatibo batzuk arintzeko neurrietan, zeinak eragin handiagoa izan duten emakumeengan, eta oztopo diren indarkeria matxistako egoeretatik ateratzeko.
-Erakundeen, udalen, foru-aldundien eta Eusko Jaurlaritzaren arteko lankidetza eta koordinazioa eskatzea, baliabideak bermatzeko eta beharrezko ekimen guztiak abian jartzeko, beren eskumenen esparruan.
Halaber, gure bizilagunei dei egiten diegu mugimendu feministak Emakumeen Aurkako Indarkeria Ezabatzeko Eguna dela-eta deitutako mobilizazioei atxikitzeko.