Joan zen urtean ekitaldi kulturalak antolatu zituzten Santixabelak ospatzeko ezinezkotasunaren aurrean. Kontzertuak, hitzaldiak eta gisa horretako ekitaldiak izan ziren herriko hainbat puntutan, eta momentuko osasun neurri guztiak beteta. Datozen hauek ere gisa horretako formatuan egitea da lehen ideia, baina oraindik zer-nolako ekitaldiak izango diren eta nola antolatuko diren erabakitzeke dago.
Uztailaren hasiera oraindik urrun badago ere, eta Santixabeletan zer antolatuko den oraindik zehazteke badago ere, gaur arratsaldean elkartu dira herriko hainbat eragile lehen erabakiak hartzeko. Joan zen urteko Kultur Biraren formatuak indarra hartu du kideen artean, eta bide horretatik jarraituko dute datozen bilerek ere.