Brigadan lan egiteko Beterri-Buruntzako udalen enplegu-prestakuntza planean izen ematea zabalik

Deialdia, lan merkatuan txertatzeko zailtasunak dituztenei zuzendua egongo da. Guztira eskualdeko udal brigadetan aritzeko 17 lanpostu eskainiko dira. Beterri-Buruntzaren enplegu prestakuntza planean izen ematea zabalik da jada.

Beterri-Buruntzako langabetuak lan merkatuan txertatzeko enplegu-prestakuntza programa martxan dute berriz eskualdeko udalek; Andoain, Astigarraga, Hernani, Lasarte-Oria, Urnieta eta Usurbilgoek. Zehazkiago esanda, udal brigadetan lan anitzetan aritzeko 17 lanpostu iragarri dituzte. Usurbilgo Udalaren kasuan, lanaldi osoko hiru lanpostu bost hilabeteetarako. 


Beterri-Buruntzako enplegu-prestakuntza plana
-Urriak 25-abenduak 10: hiriguneen mantenu ikastaroa (150 ordu).
-Ikastaroa gainditzen dutenentzat: eskualdeko udal-brigadetan operario gisa lan egiteko aukera, 17 lanpostu guztira. Usurbilen lanaldi osoko hiru lanpostu bost hilabeterako.
-Nori zuzendua: lehentasunez, Diru Sarrera Bermatzeko Errenta (DSBE) kobratzen dutenei (lanpostuen %30, 5 guztira). Gainerako lanpostuak 35 urtetik beherakoentzat, 45 urtetik gorakoentzat, denbora luzeko langabetuentzat eta bazterkeria arriskuan dauden pertsonentzat (tartean, 7 lanpostu -%40a- emakumeentzat eta beste 3 lanpostu -%15- 55 urte baino zaharragoentzat lehenetsiko dira).
-Bete beharreko baldintzak: hiriguneen mantenu ikastaroa gainditzea; Beterri-Buruntzako udaletakoren batean (Andoainen, Astigarragan, Hernanin, Lasarte-Orian, Urnietan edo Usurbilen) erroldatuta egotea; aurretik programa honen onuradun ez izana; Lanbiden langabetu gisa izena emanda egotea.
-Izen ematea: urriaren 7tik aurrera (hautagai kopuru nahikoa osatu arte) lanbide.eus web orrialdeko enplegu atalean.
-Informazio gehiago: udaletxean (Joxe Martin Sagardia plaza z/g) / 943 371 951 / enplegu@usurbil.eus
-Sustatzaileak: Usurbilgo Udala, Beterri-Buruntza, Lanbide.