"Hikastea" datorren Euskararen Egunaren bueltan

Noaua Aldizkaria 2021ko aza. 24a, 11:16

Hika aritzeko, ahotan gehiagotan eta gehiagorekin hartu eta bere erabilera sustatzeko hainbat ekimen antolatzen ari dira azken aldian Usurbilgo Euskara Taldea eta NOAUA! K.E. Udalarekin elkarlanean. Hitanoari buruzko ikastaroa jarri dute martxan hilabete honetan, "Hikalagun" ere bai lagun artean erabiltzeko. Abenduaren 3ko Euskararen Egunerako "Hikastea" iragarri dute: hitzaldia, egunotan martxan den TikTok eta Instagram bidezko lehiaketaren sari banaketa ekitaldia edota Esti eta Mikel Markezen kontzertuarekin borobilduko den "Hikodromoa", hika aritzeko gunea, hilaren 3rako. Hemen xehetasunak.

HIKASTEA
Abenduak 1, asteazkena
18:30 Hitzaldia Potxoenean: "Hitanoa hemen eta orain: adituen hitzak eta arituen ekintzak".
Hizlariak: Garbiñe Bereziartua eta Beñat Muguruza.
Zehaztasunak: 
-Hitanoa eta generoa: aberastasuna edo sexismoa?" Uda Ikastaroa antolatu zuten 2018an.
-Azpeitian hitanoa zertan den ikusteko bideari ekin zioten eta zenbait alderdiri begirako emaitzak kaleratu dituzte: generoen arteko arrakala, transmisioa eta gazteak, besteak beste.
-Hitanoarekin lotutako beste ikerketa-lerro bat jorratzeko aukera Dragoi Bolak eskaini die eta bide horretatik ere ondu dituzte pare bat lan.
-Bata irundarra eta bestea azpeitiarra izanda oso errealitate desberdinak bizi dituzte hitanoarekin, eta, esan dezakegu, horrek hitanoaren askotariko ertzak ikusten laguntzen diela.
Izen ematea: azaroaren 30era arte, usurbilkultura.eus plataforman.
Edukiera: 17 lagun.

Abenduak 2, osteguna
18:00 TikTok eta Instagram lehiaketa: lanen ikustaldia eta sari-banaketa Sutegin.

Abenduak 3, ostirala
18:00 Hikodromoa Dema plazan. Euria ariko balu, Askatasuna plazan.
Zehaztasunak: "Hika aritzeko espazioa izango da. Hika menperatzen dutenak, hika hasiak direnak zein egin nahi dutenak bildu nahi ditugu. Jai-giroan, alai. Herritarrak zein beste herrietakoak gonbidatu ditugu, euskararen aldeko ospakizun ez ezik, euskararen topagune ere izan dadin. Parte-hartzaileak binaka jarriko ditugu, eta bikoteak lau minutuan behin aldatuko ditugu. Trantsizio horiek bertso eta musikaz girotuko ditugu; izan ere, Eli Pagola eta Agin Laburubertsolariek jarriko dute elkarrizketetarako hizpidea Antton Aranburu eta Gari Otamendiren musika lagun. Jan-edanerako atsedenaren ostean, arratsaldea biribiltzeko emanaldia izango dugu".
Izen ematea: abenduaren 1era arte, usurbilkultura.eus plataforman.
Edukiera: 60 lagun.

19:30 Esti eta Mikel Markezen kontzertu akustikoa Dema plazan. Euria ariko balu, Askatasuna plazan.
Zehaztasunak: "Hikasteari amaiera emateko eta Euskararen Eguna biribiltzeko Markez aita-alaben emanaldia izango dugu herrian. Bertaratu nahi dutenei 18:00etan hikodromoan parte hartzeko gonbita egin nahi diegu, giro alaiean arratsalde-amaiera polita bizi ahal izateko".
Izen ematea: abenduaren 1era arte usurbilkultura.eus plataforman.
Edukiera: 80 lagun.

Antolatzailea: Usurbilgo Euskara Taldea.