Pirritx, Porrotx eta Marimototsen "Kuikui" ikuskizun berria ikusi ahal izateko sarrerak agortze bidean dira. Bi emanaldi daude antolatuak abenduaren 29rako Oiardo Kiroldegian. Lehenengoa arratsaldeko 16:00etarako. Saio honetarako bai badaude sarrerak momentuz, usurbilkultura.eus plataforman eskura ditzakezue 8 euroren truke. 18:30etako bigarren emanaldirako ordea ez, agortuak daude jada.
"Aurtengoan Euskararen gaiari eutsi nahi izan diogu pailazook beste behin, Aitorren eta Mariren hizkuntza zaharrari arnas bideak topatze aldera. Orduan, txoriak ginela amestu genuen, eta munduari Kuikui esan genion. Batzuk kuku, besteek piui, kerrek.... eta beleak KRAAAA!... Guk, ordea, kuikui, Marimototsek erakutsita. Izan ere, amalurra txoriek bezala ikusten eta begiratzen lagunduko baitigu Pirritxi eta Porrotxi. Ikusiko ditugu plastikoz betetako itsasoak, Txo Mikmak txikiaren, balearen eta urpean hegan dabilen pinguinoaren begietatik. Ikusiko dugu Tider migrantea, Afrikatik Baionara iritsi nahi, baina Txilipitok debekatzen diona, gauez hegan egiten duen Ontzak lagunduta bere helburuan saiatuko dena. Eta ikusiko ditugu Ilargi baserritarra eta Margarita Oiloa, saltoka hegan egiten duena. Honek arrautza berezia errun du koloretakoa. Eta jaioko da txitakolorea, Kuikui, munduari kolorea eta adorea emango diona. Eta guk ere, Kuikui txorrotxio egingo diogu munduari, geuretik, euskaratik eta euskaraz, munduko txorrotxioen sinfonian... Kui Kuikui!".
Hortxe Pirritx, Porrotx eta Marimototsek hilabeteotan ondu duen ikuskizun berriaren aurrerapena. Urte luzez egin duten moduan, bueltan izango ditugu Usurbilen. Abenduaren 29an bi emanaldi eskainiko dituzte arratsalde partean, 16:00etan eta 18:30etan Oiardo Kiroldegian.
Pirritx, Porrotx eta Marimototsen "Kuikui" ikuskizuneko emanaldi bakarrerako sarrerak salgai
Bi emanaldi eskainiko dituzte abenduaren 29an Oiardo Kiroldegian. Arratsaldeko 18:30etako saiorako sarrerak agortuak daude jada. 16:00etarako txartelak usurbilkultura.eus plataforman eskura ditzakezue 8 euroren truke.