Francisco Suarez pozik agertu da lortutako akordioarekin. “Udarregi Ikastola, Fagor Ederlan eta orain Usurbilgo udala ageriko ereduak dira, positiboak eta sozialki eraldatzaileak, eta desgaitasun funtzionala duten pertsona horiek lan-merkatuan sar daitezkeen erakusleihoa dira”, esan du PSE-EEren bozeramaileak. Hilaren 8an, bozeramaile sozialista eta Usurbilgo udaleko alkateorde Beñat Larrañaga Pauso Berriak programako arduradunekin bilduko dira. Programaren parte diren Atzegik eta Gureak-ek ere parte hartuko dute. Atzegi, Adimen Urritasuna duten Pertsonen Aldeko Gipuzkoako Elkarteak da, eta Gureak, merkatu lehiakorretan zerbitzu integrala eskaintzen duen enpresa taldea.
PSE-EEk eta udal-gobernuak akordioa egin dute Usurbilgo udalean adimen-urritasuna duen pertsona bat kontratatzeko urtebetez. Hasiera batean, PSE-EEk mozioa aurkeztu zuen martxoaren 24an, baina adostasunaren ondotik erabaki du. Mozio horretan, udal gobernuari eskatzen zion kreditu-aldaketa bat egiteko, udalak Pauso Berriak programan partaidetza diruz laguntzeko aurrekontu-partida bat adosteko.