Jaiak amaitu dira, baina herri bizitzak ez du etenik. Santixabelak agurtu eta ordu gutxira abiatu dute Udajolas Usurbilen. Goizeko 9:30etan herri erdigunean txoko ezberdinetan jarria zuten hitzordua, begirale, guraso eta haurrak elkartzeko. Gaurtik hasi, eta uztailaren 29ra arte, astelehenetik ostiralera, goizez eta lau orduz, 9:30-13:30 artean, denetariko ekintzez lagunartean gozatzeko aukera izango dute 4-12 urte arteko haur eta gaztetxoek. Ostegunetan 16:30ak arte luzatuko da Udajolas, egun horretan irteerak egitekoak dituzte eta.
Gogoan izan, aurtengoan parte-hartze marka hautsi duela Udajolasek. Inoizko deialdi arrakastatsuena izan zen udaberri partean bideratu genuen izen-ematearena. NOAUA! Kultur Elkarteak eta Usurbilgo Udalak antolaturiko ekimenean 200 lagunek adierazi zuten partehartzeko gogoa. Eta 200 lagunentzako lekua zuen Udajolasek.
Begirale talde zabal batek kudeatuko ditu udalekuok; haiei astelehen goiz honetan ateratako argazkia da albiste honi atxikia duzuena.
NOAUA! Kultur Elkarteak eta Usurbilgo Udalak antolaturiko aisialdi ekimena abian da jaiak amaitu berritan.