NOAUA!ra igorritako idatzian, aurtengo martxoa bitartean eginiko gogoeta-prozesuaz mintzo dira. “Emaitza gisa, Usurbilgo Kulturgunea abiarazteko proposamena adostu genuen, oinarri honekin: euskal kulturzaleak sortzeko norabidean lan egitea herriko kultur ekosistemako kide guztiok”.
Norabide berean lan egiteko proposamena
Euskarazko kulturgintza hauspotzeko, “herritar sortzaileak behar ditugu (amateurrak nahiz profesionalak); antolatzaileak izango diren herritarrak behar ditugu (herri ekimenetan nahiz erakunde publikoetan); kulturgintzaren industrian jardungo duten profesionalak behar ditugu; kultur kazetaritza jorratuko duten herritarrak behar ditugu; transmisioa bermatuko duten herritarrak behar ditugu (etxean, hezkuntza arautuan, ez arautuan, aisialdian...). Kulturzale horiek guztiek osatzen dute herriko kultur ekosistema, eta horiek guztiek norabide berean lan egiteko proposamena dakar Kulturguneak”.
Adi egon deialdiei
Horretarako, lau lan-ildo nagusi jorratu nahi ditu Usurbilgo Kulturguneak: Sormena, Plazak, Komunikazioa eta Transmisioa. Ildo horiei lotutako proiektuak sortzeko eta garatzeko bokazioz jardungo du Kulturguneak. Eta egungo gabeziei erantzuteko, herriko eragileen arteko elkarlana sustatuko du.
“Hori dela-eta, kulturgintzaren eragile guztiok Kulturgunean elkartzea proposatzen dugu. Adi egon deialdiei”. Bien bitartean, Kulturgunearekin harremanetan jartzeko bide nagusia helbide elektroniko hau da eta berau balia daiteke iradokizunetarako edo ekarpenetarako: usurbilgokulturgunea@gmail.com