HAPO

HAPO-a indarrean jartzetik hurbilago, zortzi urteko herri lanketaren ostean

Noaua Aldizkaria 2022ko aza. 16a, 11:54

Santueneko Auzo Plana lantzeko azken urtebetean bideratu duten parte hartze prozesua.

Azken 8 urteetan Usurbilgo herritarrekin landutako Hiria Antolatzeko Plan Orokorra fase berri batean murgildu da; hasieraz onartu ostean, aurkezpen, herriratze eta alegazio bilketarako tartean. Etorkizuneko udalerriaren garapena marraztuko duen planeamendua diseinatzeko prozesua ordea aipatu moduan, 2014an abiatu zen. Oraindik, hainbat urrats emateke daude betiko onartu eta indarrean jarri aurretik. Hemen HAPO-a osatzen ari den ibilbide luze horretako hainbat mugarriren aipamena, datozen pausoei buruzko xehetasunekin batera.

Parte-hartzea ardatz
Lanketa prozesu luzen baten emaitza da planeamendua bera. Herriari hitza ematetik, herritik jaiotakoa. Erreparatu kronologia honi. Hemen HAPO-a lantzeko bideratu diren hainbat parte-hartze prozesu:
-2014-15: “Oraina da geroa” parte hartze prozesua HAPO-aren idazketa abiatzeko.
-2016: “Usurbil Kale Irekiak” parte hartze prozesua. Espazio publikoaren eta mugikortasun iraunkorraren plana idatzi zen.
-2017-2018: Aginagako herrigunea antolatzeko proposamena egiteko parte-hartze prozesua bertakoekin.
-2020: “Guk Zubietan zer?” parte-hartze prozesua HAPOaren inguruko hausnarketa bideratu eta bertako errealitate eta beharrak identifikatzeko, Herri Batzarrak eta Usurbil zein Donostiako Udalek lankidetzan sustatua.
-2021: HAPO-aren proposamenen aurkezpena Kalezarren bertako bizilagunekin.
-2021-22: Auzoa integralki lantzen duen “Santuenea Elkarlanean” parte-hartze prozesua jorratu eta hortik plana osatu dute. Auzotarren talde eragile batek gidatu du prozesua, kanpo aholkularitza tekniko baten laguntzaz.

Azterlan ugari
Paraleloki arlokako hainbat azterlan bideratu ditu Udalak, HAPOaren dokumentuan jasoko dituztenak. Besteak beste:
-2014: Diagnostiko partekatua eta ingurumen aurrediagnostikoa.
-2015: Aurrerakina eta HAPOa idazteko irizpide eta helburuak eta Ingurumen Ebaluazio Estrategikoaren Hasierako dokumentua.
-2016: “Errioa bizi!” Oria ibaiaren paisaiarako ekintza planaren erredakzioa.
-2017: genero perspektiba eta eguneroko bizimodua Usurbilgo espazio publikoan.
-2020: Usurbilgo etxebizitzen azterketa.
-2020-21: Usurbilgo HAPOaren genero inpaktuari buruzko lanketa eta txostena eta ELE hizkuntza inpaktuko azterlana.
-2022: Ingurumen Azterketa Estrategikoa, Inpaktu Akustikoaren Azterlana eta ondare azterketa.

Planeamendua onartzeko urratsak
-Urriak 13: hasierako onarpena eman zioten ezohiko udalbatzarrean.
-Urtarrilaren 31ra arte: alegazio epea.
-Alegazioak erantzun eta onartutakoak txertatuko dituzte, HAPO dokumentua moldatuz.
-Udalak behin behinean onartu eta EAEko Lurralde Antolamendurako Batzordera bidali behar da. 
-Behin betiko onarpena: 7.000 biztanle baino gutxiagoko udalerria izanda, "Gipuzkoako Foru Aldundiari dagokio behin betiko onarpena ematea".
-Erabakia Gipuzkoako Aldizkari Ofizialean argitaratuko dute eta indarrean sartuko da HAPO berria.

Aurkezpen eta erakusketak
Aurkezpenak
Azaroak  23, asteazkena
18:00
Aginagako Eliza Zaharrean.

Azaroak 30, asteazkena
18:00
Zubietako Kaxkapen.

Erakusketak:
-Azaroak 20-22/Abenduak 7-31: Sutegi.
-Azaroak 23-29: Aginagako Eliza Zaharra.
-Azaroak 30-abenduak 6: Zubietako Kaxkape.

Arkitektoarekin hitzorduak
Azaroan eta urtarrilean
-Astelehen arratsaldeak: 17:00-19:00.
-Astearte goizak: 9:00-13:00.
Hitzordua eskatu aurrez: 943 371 951.

Antolatzailea: Usurbilgo Udala.