Aspaldi ez bezala, elur maluta artean esnatu da herria astelehen honetan eta elurra egiten segi dezake datozen orduotan. Egun osoz abisu horian segiko dugu. "Elur-kota 0-100 m inguruan egongo da eta egun amaieran 200 m-ra igo daiteke", ohartarazi du Euskalmet meteorologia agentziak. Halere, "prezipitazio txikia egingo du, egunaren erdialdeko orduetan ugariago".
Gainerakoan, giro hotza. "Ipar-osagaiko haize ahul-bizia ibiliko da, bolada gogorrekin, bereziki egunaren lehen partean. Tenperatura gutxi edo nahikoa jaitsiko da, bereziki maximoak. Izotz txikia egingo du". Euskalmet-en arabera, astearte goizaldean 6:00-11:00 artean gutxi gorabehera, elurra egin dezake Usurbilen. "Zerua hodeitsu edo oso hodeitsu egongo da. Prezipitazio txikia egingo du, zenbait lekutan ertaina. Elur-kota 100-400 m inguruan egon daiteke. Ipar-osagaiko haize ahul-bizia ibiliko da, bolada gogorrekin. Tenperaturan aldaketarik ez edo gutxi igoko da. Izotz txikia egingo du".
Asteazkenean ere elurra 100-300 metro artean egin dezake, baina askorik ez. "Zerua hodeitsu edo oso hodeitsu egongo da; arratsalde-gauean hodeiak gutxitu egingo dira. Egunaren lehen partean prezipitazio txikia egin dezake. Elur-kota 100-300 m inguruan egon daiteke. Norabide aldakorreko haize ahula ibiliko da; goizean eta arratsaldean ipar-osagaikoa nagusituko da. Tenperatura minimoetan aldaketarik ez eta maximoak gutxi igoko dira. Izotz txikia egingo du, bereziki barnealdean non handia egin dezakeen".
Informazio eguneratua hemen: euskalmet.eus